Martın 6-da Avropa Liqasının (AL) 1/8 finalına start verildi. İlk 8 oyundan yalnız birində qalib müəyyənləşmədi, ev sahibləri 3, qonaqlar isə 4 qələbə qazandılar.

"Football-plus.az" xatırladır ki, ötən il keçirilən liqa mərhələsində ilk 8 yeri tutan “Latsio”, “Atletik”, “Mançester Yunayted”, “Tottenhem”, “Ayntraxt” (Frankfurt), “Lion”, “Olimpiakos” və “Reyncers” birbaşa 1/8 finalda oynamaq hüququ qazanmışdılar. Reqlamentə əsasən, vahid liqada mübarizəni yekun cədvəlin 9-24-cü yerlərində başa vuran 16 komanda isə pley-offda iştirak etmişdi. Bu mərhələnin fevralda baş tutan oyunlarından sonra “Bude/Qlimt”, FKSB, “Ayaks”, “Real Sosyedad”, “Roma”, “Viktoriya” (Plzen), “Alkmaar” və “Fənərbaxça” da 1/8 finala vəsiqə qazanmışdılar.

Əsas mərhələni 8 oyuna 19 xalla şərikli lider kimi başa vuran “Latsio” və “Atletik” cümə axşamı fərqli nəticələr göstərdilər. İtaliya klubu Çexiyada dramatik keçən matçın qalibi oldu. “Viktoriya” ilk dəqiqələrdən rəqibdən üstün oyun nümayiş etdirsə də, hesabı künc zərbəsindən sonra romalılar açdılar. Romanyolinin qolundan sonra əsasən müdafiəyə diqqət yetirən qonaq komanda ikinci hissənin əvvəlində plzenlilərin hesabı bərabərləşdirməsinə mane ola bilmədi. 77-ci dəqiqədə Rovellanın rəqibə qarşı çox kobud hərəkətinə görə qarşısında qırmızı vərəqə görməsi ev sahiblərinin fəallaşması ilə müşayiət olundu. Çexiyalıların qalan vaxtda uğurlu nəticə qazanması üçün münasib şərait yarandı. Əsas vaxt sona çatandan 3 dəqiqə sonra müdafiəçi Jiqonun da meydandan qovulması ilə qonaqlar 9 nəfərlə mübarizə aparmalı oldular. Onların əzmkarlığına söz ola bilməz: son saniyələrdə hücuma atılan Marko Baroninin komandası İsaksenin qolu ilə qələbəni təmin etdi.

Maraqlıdı ki, İtaliya paytaxtının digər təmsilçisi də 2:1 hesablı qələbəni son saniyələrdə təmin etdi. “Roma”nın hətta “Atletik”lə ev oyununda belə çətinlik çəkəcəyi gözlənilirdi. İlk hissə Klaudio Ranyerinin komandasının üstünlüyü ilə keçsə də, hesab açılmadı. Bilbaoluların hissənin ortalarında mərkəz müdafiəçisi Vivianı zədə üzündən itirdiyini qeyd edək. Fasilədən sonra qonaq komanda İnyaki Uilyams ilə hesabı açdı, amma çox keçmədən Anxelinyo cavab qolunu vurdu. Yeray Alvaresin 85-ci dəqiqədə ikinci xəbərdarlığa görə meydandan qovulması ilə “Atletik”in müdafiəsinin mərkəzində növbəti problem yarandı. Romalılar bundan əsas vaxta əlavə olunan dəqiqələrdə Şomurodovun qələbə qolunu vurması ilə yararlandılar.

Liqa mərhələsində 18 xalla 3-cü yeri tutan “Mançester Yunayted”i İspaniyada çətin sınaq gözlədiyi aydın idi. İlk hissə qapılar qarşısında təhlükəli vəziyyətlər baxımından kasad keçdi. Fasilədən sonra Zirkzee “Real Sosyedad”ın qapısına yol tapdı. Meydan sahibləri cavab qolunu vurmaq üçün elə bir çətinlik çəkmədilər. Künc zərbəsindən sonra Fernandeş topa əli ilə toxundu və Oyarsabal əla fürsəti qaçırmadı. Qalan vaxtda üstünlük san sebastyanlıların tərəfində olsa da, bundan yararlana bilmədilər. Liqa mərhələsini məğlubiyyətsiz başa buran yeganə komanda olan İngiltərə nəhəngi seriyasını 9 oyuna çatdırdı. MY cari mövsümdə AL-də 5 qələbə qazanıb, 4 matçı isə heç-heçə başa vurub.

Amma İngiltərənin digər təmsilçisi 1/8 finala uğursuz start verdi. “Tottenhem” Niderlandda “Alkmaar”la oyuna çox sayda itki ilə çıxdı və Berqvallın avtoqolu ilə Londona məğlub qayıtdı.

Niderlandda keçirilən digər matç isə qonaq komandanın qələbəsi ilə nəticələndi. “Ayaks” Brobbi ilə “Ayntraxt”ın qapısına erkən yol tapmaqla üstünlük qazansa da, frankfurtlular qalan vaxtda iki qol vuraraq Almaniyaya əzmkar qələbə ilə qayıtdılar.

Liqa mərhələsini yalnız 3 xal toplamaqla sonuncu – 36-cı yerdə başa vuran “Qarabağ”ın 4 rəqibi iki matçda qarşılaşdı. Ağdamlıların evdə uyğun olaraq 2:3 və 1:4 hesabıyla uduzduqları FKSB ilə “Lion” Rumıniyada üz-üzə gəldilər. Fransalılar meydana ikinci hissədə çıxan Fofananın son dəqiqələrdəki dublu ilə 3:1 hesablı qələbəyə nail oldular. “Qarabağ”ın Norveçdə 2:1 hesabıyla məğlub etdiyi “Bude/Qlimt” isə öz meydanında “Olimpiakos”a böyük hesabla qalib gəldi – 3:0. Onu da xatırladaq ki, Konfrans Liqasının son qalibi olan Yunanıstan nəhəngi evdə Azərbaycan çempionunu üç cavabsız qolla məğlub etmişdi.

1/8 final, ilk oyunlar
Viktoriya (Plzen, Çexiya) – Latsio (İtaliya) 1:2
Durosinmi, 53 - Romanyoli, 18. İsaksen, 90+8.
Latsio: Provedel, Tavareş (Latsari, 55), Romanyoli, Jiqo, Maruşiç, Rovella, Genduzi, Noslin (Çauna, 62), Pedro (Vesino, 62), İsaksen, Dia (Patrik, 82).

Roma (İtaliya) – Atletik (İspaniya) 2:1
Anxelinyo, 56. Şomurodov, 90+4 - İ.Uilyams, 50.
Roma: Svilar, Ndika, Mançini, Çelik, Anxelinyo, Kristante, Pizilli (Kone, 77), Rensx (Əl-Şaaravi, 60), Baldantsi (Salemakers, 60), Dibala (Şomurodov, 71), Dovbik (Sule, 71).
Atletik: Aqirresabala, Berçiçe, Y.Alvares, Vivian (A.Paredes, 23), De Markos, Xaureqisar (Quruseta, 63), De Qalarreta, N.Uilyams (Vesqa, 77), Unay Qomes (Berenger, 77), İ.Uilyams, Sannadi (Prados, 63).

Real Sosyedad (İspaniya) – Mançester Yunayted (İngiltərə) 1:1
Oyarsabal, 70-p. – Zirkzee, 58.
Real Sosyedad: Remiro, Elustondo (Aramburu, 63), Agerd, Subeldiya, Munyos, Suçiç (Olasaqasti, 88), Turryentes (Marin, 63), Mendes, Kubo (Bekker, 80), Oyarsabal, Barreneçea (Oskarsson, 63).
Mançester Yunayted: Onana, Dalot, De Liqt, Mazraui, Yoro (Lindelöf, 87), Dorqu, Kazemiro, B.Fernandeş, Zirkzee (Kollyer, 87), Höylunn, Qarnaço (Eriksen, 77).

Alkmaar (Niderland) – Tottenhem (İngiltərə) 1:0
Berqvall, 18-öz qapısına.
Tottenhem: Vikario, Udoci (Porro, 72), Spens, Qrey, Danso, Berqvall, Bentankur, Meddison (Sarr, 72), Conson, Tel (Odober, 46), Son Hın Min (Solanke, 72/Skarlett, 90+2).

Ayaks (Niderland) – Ayntraxt (Frankfurt, Almaniya) 1:2
Brobbi, 10 – Larsson, 27. Sxiri, 70.
Ayaks: Pasveer (Qorter, 24), Şutalo, Hato, Baas, Qoey, Teylor, Henderson, Mokyo (Konadu, 71), Qodts (Berqheys, 64), B.Traore (Fits-Cim, 71), Brobbi (Edvardsen, 64).
Ayntraxt: Trapp, Kristensen, Tuta, Teate, Kollinz, Götse (Uzun, 90), Knauff (Şaibi, 80), Sxiri, Larsson, Bahoya (Braun, 73), Ekitike (Vai, 82).

FKSB (Rumıniya) – Lion (Fransa) 1:3
Belutse, 68 - Talyafiko, 30. Fofana, 86; 90.
Lion: Perri, Talyafiko, Mata, Nyakate, Meytlend-Nayls, Tolisso (Akuoku, 90+2), Matiç (Almada, 76), Tessmann (Veretu, 76), Şerki, Nuama (Fofana, 68), Mikautadze (Lakazett, 68).

Bude/Qlimt (Norveç) – Olimpiakos (Yunanıstan) 3:0
Solakis, 13-öz qapısına. Hög, 45; 55.

Fənərbaxça (Türkiyə) – Reyncers (Şotlandiya) 1:3
Ciku, 30 – Dessers, 7. Çernı, 42; 81.

Cavab oyunları martın 13-də keçiriləcək.

Bombardirlər: Əl-Kaabi (Olimpiakos) - 7, Varqa (Ferentsvaroş), Omorodion (Portu), Osimhen (Qalatasaray), Fofana (Lion), Hög (Bude/Qlimt), Çernı (Reyncers), Ən-Nəsiri (Fənərbaxça) - 6.