Aprelin 17-də Avropa Liqasının (AL) 1/4 finalına yekun vuruldu.

"Football-plus.az" xəbər verir ki, Roma və Mançesterdə keçirilən cavab oyunlarında daha maraqlı hadisələr baş verdi.

Bu mərhələnin ilk 4 oyunundan yalnız biri ev sahiblərinin qələbəsi ilə başa çatmışdı. Buna isə “Qarabağ”ın vahid liqa mərhələsində Norveçdə 2:1 hesabıyla məğlub etdiyi “Bude/Qlimt” nail olmuşdu. Ötən il keçirilən vahid liqa mərhələsini “Atletik” ilə birlikdə 8 oyuna 19 xalla şərikli lider kimi başa vuran “Latsio”nun işi asan görünmürdü. İtaliya klubu evdəki cavab görüşünün ilk hissəsini minimal üstünlüklə başa vurandan sonra da meydanda ağalıq etdi. Xaykinin seyvləri qonaqların işinə yarasa da, rusiyalı qapıçı əsas vaxtın sonuna saniyələr qalarkən Noslinin zərbəsini dəf edə bilmədi. İki oyunun nəticəsi bərabərləşdiyi üçün qaçılmaz olan əlavə vaxtda Dia romalılara lazım olan 3-cü qolu vurdu. Lakin özündə güc tapan skandinaviyalılar fərqi ikiyə endirməklə mübarizəni penalti seriyasına daşıdılar. Bu sınağın qəhrəmanı isə Çauna ilə Kastelyanosun zərbələrini dəf edən Xaykin oldu. “Bude/Qlimt” avrokuboklarda ilk dəfə yarımfinala çıxdı!

Liqa mərhələsində 18 xalla 3-cü yeri tutan “Mançester Yunayted” üçün turnirdəki hər oyunun böyük əhəmiyyətinin olduğu hamıya bəllidi. İngiltərə daxilində olduqca zəif nəticələr göstərən Ruben Amorimin komandasının Çempionlar Liqasına vəsiqə qazanmaq üçün yeganə çıxış yolu AL-də qələbədi. Liondakı ilk matçda qənaətbəxş nəticəyə (2:2) nail olan MY “Old Trafford”dakı cavab oyununun ilk yarısını iki cavabsız qolla başa vurdu. Lakin təslim olmağı ağıllarından belə keçirməyən lionlular fasilədən sonra hər iki qolun cavabını verməklə əlavə vaxtı qaçılmaz etdilər. “Overtaym”da isə əsl futbol trilleri yaşandı. 110-cu dəqiqədə qonaqlar 4:2 hesabıyla önə çıxmışdılar. Ev sahiblərinin bundan sonrakı əzmkarlığı qitə kuboklarının tarixinə düşdü. İnanılmazdı, amma “Yunayted” qalan vaxtda üç cavabsız qol vurmaqla yarımfinala çıxdı. Avrokuboklarda ilk dəfə 120 və sonrakı dəqiqələrdə iki qol vuran ilk komanda olan İngiltərə nəhəngi seriyasını 12 oyuna çatdırdı. MY cari mövsümdə AL-də 7 qələbə qazanıb, 5 matçı isə heç-heçə başa vurub.

Öz meydanında “Ayntraxt”a qalib gələ bilməyən (1:1) “Tottenhem” üçün də AL-də qələbə mövsümün qalan hissəsində ən vacib hədəfdi. Frankfurtdakı cavab görüşünü böyük motivasiya ilə keçirən londonlular fasilə ərəfəsində penalti ilə hesabı açdılar. İkinci hissəni də özünəinamlı keçirən “Tottenhem” layiqli şəkildə yarımfinala adladı. “Ayntraxt”ın məğlubiyyəti ilə avrokuboklarda Almaniya təmsilçisinin qalmadığını da qeyd edək.
İlk matçlarda qol vurulmayan yeganə oyun Qlazqoda baş tutmuşdu. Pröpperin 13-cü dəqiqədə qırmızı vərəqə ilə azlıqda qoyduğu “Reyncers” cütün favoriti sayılan “Atletik”in həmlələrinə sona qədər tab gətirə bilmişdi. Lakin Bilbaodakı oyunun nəticəsi gözlənildiyi kimi oldu. İki cavabsız qolla qalib gələn “Atletik” doğma meydanında keçiriləcək finala bir addım da yaxınlaşdı.

Beləliklə, yarımfinalda “Atletik” MY, “Tottenhem” isə “Bude/Qlimt” ilə qarşılaşacaq. Bu mərhələnin ilk oyunları mayın 1-də adı birinci göstərilən komandaların meydanında keçiriləcək.

1/4 final, cavab oyunları
Latsio (İtaliya) - Bude/Qlimt (Norveç) 3:1, p. – 2:3 (ilk oyun – 0:2)
Kastelyanos, 21. Noslin, 90+3. Dia, 100 - Helmersen, 109.
Latsio: Mandas, Latsari, Romanyoli, Xila, Maruşiç (Tavareş, 68/ Hüsay, 94), Genduzi, Rovella (Vesino, 85), İsaksen (Çauna, 84), Zakkanyi (Noslin, 88), Pedro (Dia, 68), Kastelyanos.
Bude/Qlimt: Xaykin, Şevold, Qunnersen, Byortuft, Byorkan (Serli, 103), Evyen (Moe, 89), Berq, Saltnes (Brustad-Felt, 57), Blomberq (Myaattya, 76), Hög (Helmersen, 76), Hauqe.

Mançester Yunayted (İngiltərə) - Lion (Fransa) 5:4, əlavə vaxtda (2:2)
Uqarte, 10. Dalot, 45+1. B.Fernandeş, 114-p. Maynu, 120. Maquayr, 120+1 - Tolisso, 71. Talyafiko, 78. Şerki, 105. Lakazett, 110-p.
Mançester Yunayted: Onana, Dalot, Mazraui (Şou, 46), Maquayr, Yoro, Dorqu (Amass, 100), Kazemiro, Uqarte (Maunt, 86), B.Fernandeş, Qarnaço (Eriksen, 100), Höylunn (Maynu, 86).
Lion: Perri, Mata, Nyakate, Meytlend-Nayls, Talyafiko (Çaleta-Sar, 115), Akuoku (Tessmann, 55), Tolisso, Veretu (Lakazett, 55), Şerki (Abner, 106), Mikautadze (Fofana, 64), Almada.

Ayntraxt (Frankfurt, Almaniya) - Tottenhem (İngiltərə) 0:1 (1:1)
Solanke, 43-p.
Ayntraxt: Santos, Kristensen, Tuta, Kox, Teate, Braun (Knauff, 76), Larsson (Vai, 76), Sxiri, Götse (Şaibi, 17), Baoyya (Uzun, 58), Ekitike.
Tottenhem: Vikario, Porro, Romero, Van de Veen, Udoci, Berqvall, Bentankur, Meddison (Kulusevski, 45+1), Conson (Danso, 85), Solanke, Tel (Sarr, 79).

Atletik (İspaniya) - Reyncers (Şotlandiya) 2:0 (0:0)
Sanset, 45+4-p. N.Uilyams, 80.
Atletik: Aqirresabala, De Markos, Vivian, Yeray, Lekue, De Qalarreta (Prados, 73), Xaureqisar, Berenger (Vesqa, 87), Sanset (U.Qomes, 82), N.Uilyams (Calo, 87), Sannadi (Quruseta, 73).
Reyncers: Kelli, Tavernye, Sauttar, Baloqun (İqman, 50), Yılmaz (Barron, 23), Jefte, Raskin, Haci (Nsyala, 46), Çernı (Bayrami, 84), Dyomande (Pereyra, 84), Dessers.

Bombardirlər: Hög (Bude/Qlimt), Əl-Kaabi (Olimpiakos) - 7, Varqa (Ferentsvaroş), Omorodion (Portu), Osimhen (Qalatasaray), Fofana (Lion), Çernı (Reyncers), Ən-Nəsiri (Fənərbaxça) - 6.