Aprelin 10-da Avropa Liqasının (AL) 1/4 finalına start verildi.

"Football-plus.az" xəbər verir ki, ilk 4 oyundan üçü heç-heçə başa çatdı, ev sahiblərindən yalnız biri qələbə qazandı.

Ötən il keçirilən vahid liqa mərhələsini “Atletik”lə birlikdə 8 oyuna 19 xalla şərikli lider kimi başa vuran “Latsio” avrokuboklarda son 7 ildə ilk dəfə 1/4 finala çıxıb. “Qarabağ”ın vahid liqa mərhələsində Norveçdə 2:1 hesabıyla məğlub etdiyi “Bude/Qlimt” 1/8 finalda Konfrans Liqasının son qalibi olan “Olimpiakos”u təsadüfən mübarizədən kənarlaşdırmadığını (3:0, 1:2) göstərdi. İtaliya klubu üçün Norveçə səfər uğursuz alındı.

Yekun hesab romalılar üçün daha pis ola bilərdi. Mandas qonaqları bir neçə dəfə real qoldan xilas etdi. Amma yunan qapıçı fasilədən sonra Saltnesin iki zərbəsi qarşısında aciz qaldı. 0:2 hesablı məğlubiyyət “Latsio” üçün bu mövsüm turnirdə 2-ci oldu.

Liqa mərhələsində 18 xalla 3-cü yeri tutan “Mançester Yunayted” üçün AL-dəki hər oyunun böyük əhəmiyyəti var. İngiltərədəki işləri bərbad olan Ruben Amorimin komandasının Çempionlar Liqasına vəsiqə qazanmaq üçün yeganə çıxış yolunun bu turnirdə qələbə olduğu hamıya bəllidi.

MY heç də asan səfərlərdən sayılmayan Liondakı matçda ara-sıra üstün oyun nümayiş etdirdi. İlk hissədə cərimə zərbəsindən sonra vurulan qarşılıqlı qollar fasiləyə qədər heç-heçəni labüd etdi. İkinci hissə sanki birincinin davamı oldu. Üstünlüyü sıra ilə ələ alan rəqiblər son dəqiqələri əsl futbol trillerinə çevirdilər. Əvvəlcə Zirkzee Bruno Fernandeşin ötürməsi ilə qonaqları önə keçirdi.

Lionlular əzmkarlıq göstərməklə son saniyələrdə Şerkinin qolu ilə məğlubiyyətdən qaçdılar. Liqa mərhələsini məğlubiyyətsiz başa buran yeganə komanda olan İngiltərə nəhəngi seriyasını 11 oyuna çatdırdı. MY cari mövsümdə AL-də 6 qələbə qazanıb, 5 matçı isə heç-heçə başa vurub.

İngiltərənin digər təmsilçisi də ilk oyunda rəqibi ilə “sülh”ə razılaşdı. Fərq ondadı ki, “Tottenhem” öz meydanında “Ayntraxt”a qalib gələ bilmədi. Amma Londonda qələbəyə layiq olan tərəf məhz ev sahibləri idi. Qapısından erkən qol buraxan ingilislərin buna cavabı da tez oldu. Fasilədən sonrakı mübarizə frankfurtlular üçün çox ağır keçdi.

Bəxtin londonluların üzünə gülmədiyini qeyd etməliyik. Berqvall ilə Bentankurun zərbələrindən sonra top qapı çatına dəydi. “Ayntraxt”ın qapıçısı Santosun Son Hın Min ilə Van de Veenin zərbələrinə inanılmaz reaksiya verdiyini də vurğulayaq.
Cümə axşamı qol vurulmayan yeganə oyun Qlazqoda baş tutdu. “Reyncers” ilə rəqabətdə favorit sayılan “Atletik” bu rəqibi ilə qitə arenasındakı ilk görüşünü uğurla başa vura bilərdi. Pröpper 13-cü dəqiqədə komandasını azlıqda qoydu. Hakim İştvan Kovaç cərimə meydançasına şığıyan İnyaki Uilyamsa qarşı kobud oynayan meydan sahiblərinin müdafiəçisinə sarı vərəqə göstərsə də, VAR-ın müdaxiləsindən sonra qərarını “qırmızı”ya dəyişdi.

Şotlandiyalılar qalan vaxtda meydanın hər qarışı və top uğrunda fədakarcasına mübarizə apardılar. Bəzən hətta bilbaoluların qapısı qarşısında real təhlükələr də yaratdılar. “Atletik”in 2-ci hissədə təzyiqi artırması Berengerin qolu ilə nəticələndi. Lakin qol ofsayda görə sayılmadı. Çox keçmədən qonaqlar penalti vurmaq hüququ qazandılar. Amma qapıçı Kelli həmin Berengerin zərbəsinin qarşısını alaraq “Reyncers”in fevralın əvvəlindən sonra ilk dəfə top buraxmamasında böyük rol oynadı.

1/4 final, ilk oyunlar
Bude/Qlimt (Norveç) - Latsio (İtaliya) 2:0
Saltnes, 47; 69.
Bude/Qlimt: Xaykin, Şevold, Qunnersen, Byortuft, Byorkan, Evyen, Berq, Saltnes (Brustad-Felt, 86), Blomberq (Myaattya, 86), Hög (Helmersen, 81), Hauqe.
Latsio: Mandas, Hüsay (Latsari, 46), Romanyoli, Xila, Maruşiç, Genduzi, Vesino, İsaksen (Çauna, 81), Zakkanyi (Noslin, 81), Pedro (Kastelyanos, 64), Dia (Dele Başiru, 46).

Lion (Fransa) - Mançester Yunayted (İngiltərə) 2:2
Almada, 26. Şerki, 90+5 – Yoro, 45+5. Zirkzee, 88.
Lion: Perri, Mata, Nyakate, Meytlend-Nayls, Talyafiko, Akuoku (Lakazett, 51), Tolisso, Veretu, Şerki, Mikautadze, Almada.
Mançester Yunayted: Onana, Dalot, Mazraui, Maquayr (Lindelöff, 83), Yoro, Dorqu, Kazemiro, Uqarte (Maunt, 72), B.Fernandeş, Qarnaço (Maynu, 83), Höylunn (Zirkzee, 63).

Tottenhem (İngiltərə) - Ayntraxt (Frankfurt, Almaniya) 1:1
Porro, 26 – Ekitike, 6.
Tottenhem: Vikario, Porro, Romero, Van de Veen, Udoci (Spens, 79), Berqvall, Bentankur, Meddison (Sarr, 79), Conson, Son Hın Min (Tel, 79), Solanke (Rişarlison, 88).
Ayntraxt: Santos, Kristensen, Tuta, Kox, Teate, Braun (Nkunku, 90+1), Sxiri, Götse (Uzun, 90+1), Larsson, Baoyya (Şaibi, 70), Ekitike (Vai, 89).

Reyncers (Şotlandiya) - Atletik (İspaniya) 0:0
Reyncers: Kelli, Tavernye, Sterlinq, Pröpper, Baloqun, Yılmaz (Jefte, 68), Rays (Ballon, 67), Raskin, Çernı (Makkozlend, 90+5), Dessers (İqman, 85), Haci (Bayrami, 90+4).
Atletik: Aqirresabala, De Markos (Qorosabel, 90+3), Vivian, Yeray, Lekue, De Qalarreta (Prados, 62), Xaureqisar, İ.Uilyams, Sanset (Berenger, 74), N.Uilyams, Sannadi (Quruseta, 61).

Cavab oyunları aprelin 17-də keçiriləcək.

Bombardirlər: Hög (Bude/Qlimt), Əl-Kaabi (Olimpiakos) - 7, Varqa (Ferentsvaroş), Omorodion (Portu), Osimhen (Qalatasaray), Fofana (Lion), Çernı (Reyncers), Ən-Nəsiri (Fənərbaxça) - 6.