Martın 13-də Avropa Liqasının (AL) 1/8 finalına yekun vuruldu. 8 qalibdən yalnız biri – “Reyncers” rəqibini cavab oyunundan sonra zərurətə çevrilən penalti seriyasında üstələməyə məcbur oldu.

Ötən il keçirilən vahid liqa mərhələsini 8 oyuna 19 xalla şərikli lider kimi başa vuran “Latsio” və “Atletik” ilk matçlarda fərqli nəticələr göstərsələr də, hər iki iddiaçı 1/4 finala vəsiqə qazandı. İtaliya klubu Çexiyada dramatik keçən matçı Rovella ilə Jiqonun meydandan qovulmasına görə 9 nəfərlə başa vurmuş və son dəqiqələrdə 2:1 hesablı qələbəni təmin etmişdi. Halbuki “Viktoriya” ümumilikdə romalılardan üstün oyun nümayiş etdirmişdi. Plzenlilər İtaliyadakı cavab görüşünün böyük hissəsində də çox yaxşı təsir bağışladılar. Lakin yaxaladıqları qol şanslarından yalnız birini dəyərləndirə bildilər. Fasilədən sonra Şultsun dəqiq zərbəsi iki oyuna görə hesabın bərabərləşməsini təmin etdi. Miroslav Koubekin komandası bundan sonra tədricən qələbə hesabını qorumaq haqda düşünməyə başladı. Ev sahibləri isə əksinə, üstünlüyü ələ alaraq qapıya həmlələrlə mübarizənin əlavə vaxta qədər uzanmasına yol vermədilər. Plzendə olduğu kimi, bu dəfə də qapıya yol tapan müdafiəçi Romanyoli “Latsio”nun avrokuboklarda son 7 ildə ilk dəfə 1/4 finala çıxmasında böyük rol oynadı.

Maraqlıdı ki, İtaliya paytaxtının digər təmsilçisi də ilk oyunda 2:1 hesablı qələbəni son saniyələrdə təmin etmişdi. “Roma”nın“Atletik”lə səfər oyununda daha çox çətinlik çəkəcəyi gözlənilirdi. Klaudio Ranyeri komandasının mərhələni adlamaq şansının 50 faizə bərabər olduğunu demişdi. Amma müdafiəçi Hummels 11-ci dəqiqədə Sannadiyə qarşı aşkar kobudluğuna görə qarşısında birbaşa qırmızı vərəqə görməklə bu faizi minimuma endirdi. Üstünlüyü tamamilə ələ alan bilbaoluların cəhdləri yalnız hissənin sonunda bəhrə verdi. Niko Uilyams ilə hesabı açan meydan sahibləri fasilədən sonra daha iki qol vuraraq iki oyuna görə əhəmiyyətli üstünlüyə nail oldu. Qonaq komandanın gücü yalnız penalti ilə təsəlli qolunu vurmağa çatdı.

Liqa mərhələsində 18 xalla 3-cü yeri tutan “Mançester Yunayted” ötən həftə İspaniyada sərfəli nəticəyə (1:1) nail olmuşdu. İngiltərədəki işləri bərbad olan Ruben Amorimin komandasının Çempionlar Liqasına vəsiqə qazanmaq üçün yeganə çıxış yolunun AL-də qələbə olduğu hamıya bəllidi. MY “Real Sosyedad”a qarşı həlledici oyunda qapısında erkən qol görsə də, çox keçmədən Fernandeş ilə cavab qolunu vurdu. Penalti ilə 10-cu dəfə qol sevinci yaşayan Bruno turnirdə yeni rekord müəyyən etdi. Fasilədən sonra mançesterlilərin üstünlüyü birəbeş artdı. Nəticədə Fernandeş növbəti penalti ilə komandasını önə keçirdi. 63-cü dəqiqədə Aramburunun Dorquya qarşı kobud oyuna görə meydandan qovulması MY-nin işini asanlaşdırdı. Qalan vaxtda Fernandeş het-trik etdi, Dalot isə hesabı darmadağın həddinə çatdırdı. Liqa mərhələsini məğlubiyyətsiz başa buran yeganə komanda olan İngiltərə nəhəngi seriyasını 10 oyuna çatdırdı. MY cari mövsümdə AL-də 6 qələbə qazanıb, 4 matçı isə heç-heçə başa vurub.
İngiltərənin digər təmsilçisi də 1/4 finala çıxdı. Niderlandda “Alkmaar”la oyuna çox sayda itki ilə çıxan və minimal hesabla uduzan “Tottenhem” Londonda 3:1 hesablı qələbə ilə növbəti mərhələyə vəsiqə qazandı.

“Ayaks”ı Niderlandda olduğu kimi Frankfurtda da məğlub edən “Ayntraxt” da 8 ən güclü komanda sırasına qoşuldu. Liqa mərhələsini yalnız 3 xal toplamaqla sonuncu – 36-cı yerdə başa vuran “Qarabağ”ın 4 rəqibi iki matçda növbəti dəfə qarşılaşdı. Ağdamlıların Bakıda uyğun olaraq 2:3 və 1:4 hesabıyla uduzduqları FKSB ilə “Lion” arasında Rumıniyada keçirilən ilk görüş qonaqların 3:1 hesablı qələbəsi ilə nəticələnmişdi. Fransalılar cümə axşamı buxarestlilərin qapısından 4 cavabsız top keçirdilər. Maraqlıdı ki, “Qarabağ”ın Norveçdə 2:1 hesabıyla məğlub etdiyi “Bude/Qlimt” ilk matçda öz meydanında “Olimpiakos”a böyük hesabla qalib gəlmişdi (3:0). Onu da xatırladaq ki, Konfrans Liqasının son qalibi olan Yunanıstan nəhəngi evdə Azərbaycan çempionunu üç cavabsız qolla məğlub etmişdi. Pireyrilər cavab oyununda 2:1 hesablı qələbə ilə təsəlli tapdılar. Beləliklə, əsas mərhələdə “Qarabağ”la qarşılaşan üç komanda – “Tottenhem”, “Lion” və “Bude/Qlimt” AL-də mübarizəni davam etdirir.

1/8 final, cavab oyunları
Latsio (İtaliya) - Viktoriya (Plzen, Çexiya) 1:1 (ilk oyun - 2:1)
Romanyoli, 77 – Şults, 52.
Latsio: Provedel, Tavareş (Latsari, 67), Romanyoli, Patrik (Xila, 79), Maruşiç, Genduzi, Vesino, İsaksen, Zakkanyi, Pedro (Dele Başiru, 79), Kastelyanos (Dia, 67).

Atletik (İspaniya) - Roma (İtaliya) 3:1 (1:2)
N.Uilyams, 45+3; 82. Berçiçe, 68 – L.Paredes, 90+3-p.
Atletik: Aqirresabala, De Markos, Nunyes, A.Paredes (Lekue, 68), Berçiçe, De Qalarreta (Prados, 88), Xaureqisar, İ.Uilyams, U.Qomes (Berenger, 46), N.Uilyams, Sannadi (Quruseta, 77).
Roma: Svilar, Ndika, Mançini, Hummels, Rensx (Əl-Şaaravi, 83), Anxelinyo, L.Paredes, Kristante (Salemakers, 83), Baldantsi (Pizilli, 61), Dibala (Şomurodov, 61), Dovbik (Sule, 53).

Mançester Yunayted (İngiltərə) - Real Sosyedad (İspaniya) 4:1 (1:1)
B.Fernandeş, 16-p.; 50-p.; 87. Dalot, 90+1 - Oyarsabal, 10-p.
Mançester Yunayted: Onana, Dalot, De Liqt, Mazraui, Heven, Dorqu, Kazemiro (Kollyer, 78), B.Fernandeş, Zirkzee (Eriksen, 88), Höylunn, Qarnaço.
Real Sosyedad: Remiro, Elustondo (A.Traore, 73), Subeldiya (Aramburu, 56), Agerd, Munyos, Marin (Turryentes, 56), Subimendi, Mendes, Bekker (Barreneçea, 56), Kubo, Oyarsabal (Oskarsson, 76).

Tottenhem (İngiltərə) - Alkmaar (Niderland) 3:1 (0:1)
Odober, 26; 74. Meddison, 48 - Koopmeyners, 63.
Tottenhem: Vikario, Porro, Romero, Van de Veen (Qrey, 61), Spens, Berqvall (Devis, 84), Sarr, Meddison (Bissuma, 77), Odober (Conson, 77), Son Hın Min, Solanke.

Ayntraxt (Frankfurt, Almaniya) - Ayaks (Niderland) 4:1 (2:1)
Baoyya, 7. Götse, 25; 82. Ekitike, 67 - Teylor, 78.
Ayntraxt: Santos, Kristensen (Amenda, 85), Tuta, Kox, Braun, Sxiri (Batşuayi, 76), Knauff, Larsson, Götse (Şaibi, 85), Baoyya (Uzun, 72), Ekitike (Daud, 76).

Lion (Fransa) - FKSB (Rumıniya) 4:0 (3:1)
Mikautadze, 14; 47. Nuama, 37; 88.
Lion: Perri, Mata, Nyakate (Çaleta-Sar, 46), Meytlend-Nayls, Abner (Kyumbedi, 75), Tolisso (Matiç, 53), Tessmann (Almada, 53), Veretu, Şerki (Fofana, 65), Nuama, Mikautadze.

Olimpiakos (Yunanıstan) - Bude/Qlimt (Norveç) 2:1 (0:3)
Yaremçuk, 53; 65 - Hög, 36.
Bude/Qlimt: Xaykin, Şevold (Vembanqomo, 69), Qunnersen, Byortuft, Byorkan, Evyen (Myaattya, 90+2), Berq, Saltnes (Euklenn, 90+2), Blomberq, Hög (Helmersen, 69), Hauqe (Nilsen, 87).

Reyncers (Şotlandiya) - Fənərbaxça (Türkiyə) 0:2, p. – 3:2 (3:1)
Şimanski, 45; 73.

İlk oyunları aprelin 10-da keçiriləcək 1/4 finalda cütlər belə formalaşıb: Lion - Mançester Yunayted, Tottenhem – Ayntraxt, Reyncers – Atletik, Bude/Qlimt – Latsio.

Bombardirlər: Hög (Bude/Qlimt), Əl-Kaabi (Olimpiakos) - 7, Varqa (Ferentsvaroş), Omorodion (Portu), Osimhen (Qalatasaray), Fofana (Lion), Çernı (Reyncers), Ən-Nəsiri (Fənərbaxça) - 6.