''Beşiktaş'' həftəsonu baş tutacaq mövsümün son böyük İstanbul derbisi öncəsi heyətlə bağlı müəyyən problemlər yaşayır.

''Football-plus.az'' xəbər verir ki, bazar günü 34-cü tur çərçivəsində ''Beşiktaş'' ''Fənərbaxça''nın qonağı olacaq. Mövsümü çox qeyri-sabit keçirən ''qartal'' 3-cü pillə uğrunda mübarizə aparırsa, ''Fənər'' qalib gələrək ''Qalatasaray''ın təqibini davam etdirmək niyyətindədi.

Bu arada ''ağ-qaralar''da müdafiənin mərkəzi ilə bağlı problemlər var. Feliks Uduoxai zatən uzun müddətdi, zədə üzündən oynamır. Digər mərkəz müdafiəçisi Əmirhan Topçu ötən tur ''Hatayspor''la qarşılaşmada zədələndi. Qeyri-adi bir şey baş verməsə, o, derbini buraxmalı olacaq. Bütün bunlar azmış kimi Qabriel Paulista da həftənin əvvəlindəki məşqdə zədə aldı. 4 mərkəz müdafiəçisindən 3-ü zədəli olduğu üçün baş məşqçi Ole Qunnar Sulşerin bu problemi necə yoluna qoyacağı maraq doğururdu. Amma bu günkü məşqdə Paulistanın peyda olması camiəni və fanatları sevindirib. Braziliyalı futbolçunun derbidə komandasına yardım edə biləcəyi məlum olub. Əmirhan Topçuya gəlincə, onun az da olsa, oynamaq ehtimalı var.

Yekun qərar şənbə günü veriləcək. Topçu oynaya bilməsə, ''Beşiktaş'' derbiyə müdafiənin mərkəzində Paulista - Tayyib Sanuç dueti ilə çıxmalı olacaq. Ancaq Sanuç bir müddət öncə ardıcıl iki qarşılaşmada qırmızı vərəqə alması ilə diqqət mərkəzinə düşmüşdü. 25 yaşlı futbolçu əvvəlcə aprelin 3-də kubokda evdə ''Göztəpə'' (1:3) və aprelin 7-də superliqada səfərdə ''Kasımpaşa'' (1:1) ilə oyunlarda qırmızı vərəqə almışdı. Özü də hər iki halda ilk yarıda qovulmuşdu! Ona görə Tayyip Sanuçun derbidə ilk dəqiqələrdən oynamaq şansı qazanacağı təqdirdə necə təsir bağışlayacağı maraq doğurur.