''Beşiktaş'' derbidə ''Fənərbaxça''nı yenərək qara zolaqdan çıxsa da, Avropa Liqasında ''Bude/Qlimt'' ilə səfər oyunundan öncə komandanın heyətlə bağlı çox böyük sıxıntıları var.

Çiro İmmobile yenə zədələnərək bir neçə həftəliyə sıradan çıxıb. Amma əsas sıxıntı müdafiə xəttindədi. Zatən Nəcip Uysalı uzun müddətə, əməliyyat olunan Qabriel Paulistanı isə 3 aylığa itirən ''Qartal'' Uduoxainin də tam sağlam olmaması üzündən derbiyə müdafiənin mərkəzində Əmirhan Topçu - Tayyip Talha Sanuç ikilisi ilə çıxmışdı. Amma yenə qorxulan oldu və Tayyip 70-ci dəqiqədə zədələnərək Zaynutdinovla əvəzləndi. Uduoxai hələ də özünü tam olaraq yaxşı hiss etmədiyindən Norveçdə belə görünür ''ağ-qaralar'' yenə Zaynutdinovla Topçunun ümidinə qalacaqlar. Universal Zaynutdinov müdafiənin mərkəzində oynamalı olacaq. Qazaxıstan yığmasının üzvü bu mövsüm heç bir oyunda start heyətində meydana çıxmayıb.

Əvvəlki məşqçi Van Bronkhorstun gözünə girə bilməyən 26 yaşlı futbolçu 2024/25-də 4 rəsmi oyunda ümumilikdə cəmi 30 dəqiqə forma geyib. Bütün bu problemlər azmış kimi sol müdafiəçi Masuaku da cəzalıdı. Onu 20 yaşlı Əmrəcan Terzi əvəzləyəcək.

ƏLİ