Həftəsonu Türkiyə çempionatında bütün diqqətlər İstanbul derbisinə yönələcək.

Şənbə günü 15-ci tur çərçivəsində lider ''Qalatasaray''ı qarabaqara təqib edən ''Fənərbaxça'' son 5 turda cəmi 2 xal qazanan və problemlər məngənəsində boğulan ''Beşiktaş''ın qonağı olacaq. Bu önəmli qarşılaşmanın hakimi artıq bəllidi.

Böyük maraqla gözlənilən derbini Mehmet Türkmən idarə edəcək. Əslən Konyadan olan və İstanbul Universitetinin Hüquq fakültəsini bitirən 29 yaşlı Türkmən ötən mövsümdən etibarən superliqa oyunlarına təyinat alır. Bu, onun karyerasının ilk İstanbul derbisi olacaq. Türkmən indiyə qədər ''Beşiktaş''ın 1, ''Fənərbaxça''nın iki oyununu idarə edib. Bu qarşılaşmaların hamısı cari mövsümə təsadüf edib.

Onun idarəçiliyi altında ''Qartal'' 2-ci turda ''Antalyaspor''u 4:2, ''Fənərbaxça'' isə 4-cü turda ''Alanyaspor''u 3:0 və 10-cu turda ''Bodrum''u 2:0 məğlub edib. Cari ''futbol ili''ndə superliqada ümumilikdə 10 qarşılaşmada fit sahibi olan Türkmən mövsümün əvvəlində ''Qalatasaray''la ''Beşiktaş'' arasında baş tutan superkubok matçının 4-cü hakimi funksiyasını icra etmişdi. Onunla bağlı ən maraqlı məqam isə ''Milyonçu'' şousunda iştirak etməsidi. Türkmən 2017-ci ildə 22 yaşı olarkən ATV kanalında yayınlanan şouda iştirak etmiş və 6-cı sualda yarışmanı dayandıraraq 1000 lirə qazanmışdı.

ƏLİ