Cox uğursuz mövsüm keçirən ''Beşiktaş'' bir tərəfdən də zədə problemindən qurtula bilmir.

''Football-plus.az'' xəbər verir ki, ''qartal'' son turda evdə ''İstanbul BŞ''yə uduzmaqla 3-cü pillə uğrunda mübarizədə ciddi zərbə aldı. Amma komanda həmin oyunda tək 3 xal yox, həm də aparıcı oyunçularından olan Ernest Muçini itirdi.

Albaniyalı futbolçu zədə üzündən hələ ilk yarıda əvəzlənməli olmuşdu. Tibbi müayinə zamanı sağ ayaq əzələsində problem aşkarlanan istedadlı futbolçu ən azı 3-4 həftə oynaya bilməyəcək. Bu da o deməkdi ki, Muçi həm də 2 həftə sonra ''Fənərbaxça''ya qarşı baş tutacaq prinsipial derbini də böyük ehtimalla buraxmalı olacaq.

''Beşiktaş''da müdafiə xəttindəki ciddi itkilər azmış kimi indi də önəmli vingerlərdən biri sıradan çıxdı. Sonuncu zədə ilə birlikdə ''ağ-qaralar''da bu mövsüm zədə faktlarının sayı 28-ə yüksəldi! ''Beşiktaş'' bu göstəricidə superliqada hamıdan öndədi. Muçidən başqa Feliks Uduoxai, Əmirhan Topçu, Elan Rikardo və Bəxtiyar Zaynutdinov da hazırda zədəsini müalicə etdirməklə məşğuldu. Komandanın kapitanlarından və ən təcrübəli futbolçularından olan Nəcip Uysal isə zatən mövsümün əvvəlində yaşadığı ağır zədədən sonra uzun müddətdi, meydana çıxa bilmir.

Müdafiə xəttindəki problemlər üzündən baş məşqçi Ole Qunnar Sulşer son oyunda Oksleyd-Çemberleyni müdafiənin sağında, Svenssonu isə mərkəzdə oynatmalı olmuşdu. Əmirhan Topçu həftəsonu ''Göztəpə'' ilə oyuna qədər sağalmasa, həmin matçda da eyni problem yaşanacaq.

Ernest Muçiyə gəlincə, onun bu mövsüm 34 rəsmi oyunda 7 qol, 3 məhsuldar ötürmə ilə fərqləndiyini bildirək.