"Araz-Naxçıvan" ölkə kubokunun yarımfinal mərhələsinin cavab oyununda "Qarabağ”a uduzdu - 0:3.

"Football-plus.az" "qırmızı-ağlar"ın baş məşqçisi Elmar Baxşıyevin oyunsonrası mətbuat konfransından hesabatı təqdim edir.

- Ağır oyun alındı. Bizi nə gözlədiyini bilirdik. İlk oyunda qələbə qazansaq da, cavab görüşünün ağır keçəcəyini bilirdik. Ümumi iki fərqli hissə oynadıq. Komanda şəkilində ilk hissədə oyunumuz alındı. İkinci yarıda oyunun ritmini itirdikdən sonra rəqib üstünlüyü ələ aldı. Son oyunlara köklənəcəyik.

- Oyuna pis başlamadız. Rəqib müdafiəyə çəkilməyə məcbur etdi?
- Səviyyə baxımından bizdən üstündülər. Oturuşmuş heyəti və sabitliyi var. Oyunu çevirə biləcəyimizi düşünürdüm. 25-ci dəqiqədəki epizoda baxsaz, oyunun dəyişmə anı da ola bilərdi. Bizim baxdığımız epizod təmiz penaltidı. Ümid edirəm ki, bizə qarşı səhvlər olmayacaq. Vandersonun epizodunda "qırmızı" dəyərləndirilə bilərdi. İkili standart hiss olunur. Mən bunu hiss edirəm. Ümid edirəm ki, bizə qarşı daha obyektiv olarlar.

- Bu ikili standartın səbəbini nədə görürsüz?
- Mən onu düşünsəm, işdən uzaq qalaram. Bizə simpatiya hiss olunmur.

- Antipatiya var? Elmar Baxşıyevə yoxsa, Araz-Naxçıvan”a?
- Məşqçi ilə mübarizə aparırlarsa, ayıbdı.

- Finala çıxmaqdan ötrü heyətiniz kasad deyil?
- Xeyr. Zədəli və cəzalı futbolçularımız olduğundan problem yaşadıq.

ƏSƏD SEYİDOV