"Araz-Naxçıvan" ölkə kubokunun yarımfinal mərhələsinin ilk oyunu çərçivəsində "Qarabağ"a qalib gəldi.

"Football-plus.az" xəbər verir ki, Muxtar Respublika təmsilçisinin baş məşqçisi Elmar Baxşıyev oyunsonrası mətbuat konfransında jurnalistlərin suallarını cavabladı.

- Maraqlı oyun alındı. Hər iki komanda meydançada yaxşı mübarizə apardı. Bizi oyunda nəyin gözlədiyini bilirdik. Komandam ortaya yaxşı iş qoydu. Bu oyunu unudub qarşıdakı çempionat matçına hazırlaşacağıq.

- "Qarabağ" həm premyer-liqada, həm də ölkə kubokunda sözünü deyən komandadı. Bir top fərqi sizi nə dərəcədə arxayınlaşdırır?
- Bu gün uduzsaq da, hansısa üstünlükdən və ya əskiklikdən danışmayacaqdım. Kimə qarşı oynadığımızı bilirik. "Qarabağ"ın reklama ehtiyacı yoxdu. İndi çempionat matçına köklənməliyik. Vaxtı gələndə cavab oyunu haqda düşünəcəyik.

- Maraqlıdı ki, kubokun 1/4 finalında "Zirə"ni üç penaltini dəqiq yerinə yetirməklə keçdiz. Bu günkü qol da penaltidən vuruldu. Bu təsadüfü necə şərh edə bilərsiz?
- Hakimlərin verdiyi qərarlardı. Məncə də təsadüfdü. Penalti futbolun içində olan elementdi. Ümumiyyətlə, oyunda penaltiləri yox, futbolçuların məşqdə etdiklərini meydanda da göstərmələri daha çox sevindirir.

- Aparıcı oyunçular Ramon Maçado və Alan Dias start heyətində yox idi. Bunun səbəbi nə idi?
- Seçim baş məşqçi kimi mənə məxsusdu. Bu haqda açıqlama vermək istəmirəm.

KƏNAN BAHADIR