Fevralın 20-də Avropa Liqasının (AL) pley-offunda cavab oyunları keçirildi. Bununla da 1/8 finalda çıxış edəcək daha 8 komanda müəyyənləşdi.

Xatırladaq ki, vahid liqa mərhələsində “Latsio”, “Atletik”, “Mançester Yunayted”, “Tottenhem”, “Ayntraxt” (Frankfurt), “Lion”, “Olimpiakos” və “Reyncers” ilk 8 yeri təmin etməklə birbaşa 1/8 finalda oynamaq hüququ qazanıb. Reqlamentə əsasən, mübarizəni yekun cədvəlin 9-24-cü yerlərində başa vuran 16 komanda isə pley-offda iştirak etdi. Bu mərhələdə iki oyunun nəticəsinə əsasən rəqibini üstələyəcək 8 iştirakçı 1/8 finala çıxdı.

İlk matçlarda qeydə alınan nəticələrdən sonra “Real Sosyedad”, “Fənərbaxça”, “Ayaks”, FKSB, “Alkmaar”, “Ferentsvaroş” və “Tvente” az-çox üstünlük qazanmışdı. Bu komandalardan ilk beşi növbəti mərhələyə adlaya bildi. Danimarkada keçirilən oyunda 2:1 hesabıyla qalib gələn “Real Sosyedad” evdə ilk 18 dəqiqə ərzində “Midtüllann”ın qapısına iki dəfə yol tapdı. Buna baxmayaraq, ruhdan düşməyən qonaqlar hesabı bərabərləşdirməyi bacardılar.

Matçın belə gedişi ilə qətiyyən razılaşmayan san sebastyanlılar fasiləyə az qalmış yenidən hesabda önə keçdilər. Danimarkalıların ilk hissəni çox zəif keçirən müdafiəçisi Bek fasilədə əvəzlənməyə layiq idi. Amma kapitanın ikinci hissədə meydanda görünməməsi heç də qonaq komandanın arxa xəttini gücləndirmədi. İspaniyalılar sona yaxın daha iki qol vurmaqla 5:2 hesabıyla qalib gəldilər.
Qitənin 5 aparıcı liqasından pley-offda çıxış edən ikinci komanda da səfərdə qənaətbəxş nəticəyə (1:1) nail olmuşdu.

“Roma” cavab oyununun 27-ci dəqiqəsində “Portu”nun hücumçusu Omorodionun baxımlı zərbə ilə hesabı açmasına mane ola bilmədi. İtaliyalılar buna çox keçmədən reaksiya verdilər: Dibalanın 4 dəqiqəyə vurduğu iki qol romalıların fasiləyə üstün durumda yollanmasını təmin etdi. İkinci hissənin əvvəlində Paredesi vuran Euştakionun birbaşa qırmızı vərəqə ilə meydandan qovulması ev sahiblərinin işinə yaradı. Qalan vaxtda tərəflər hərəyə bir qol vurdu və Klaudio Ranyerinin təyinatından sonra bir qədər özünə gələn “Roma” mərhələni adladı.

“Ayaks” ilk matçda rəqib meydanında daha sərfəli nəticəyə nail olmuşdu. Amsterdamlılar “Yunion”a iki cavabsız qolla qalib gəlməklə 1/8 finalın qapısını açsalar da, belçikalılar Niderlandda hamını təəccübləndirdilər. İlk hissəni 2:0 hesabıyla başa vuran qonaqlar 25-ci dəqiqədə topun qarşısını əli ilə alan və qırmızı vərəqə ilə cəzalanan Klassenə də minnətdar olmalıdılar. “Ayaks” fasilədən sonra azlıqda oynamaqla çox əziyyət çəkdi və mübarizə 30 dəqiqəlik əlavə vaxta qədər uzandı. “Overtaym”ın əvvəlində rəqibin cərimə meydançasında əllə oynamasına görə qazanılan penaltini Teylor dəqiq yerinə yetirdi. Bu qol Françesko Fariolinin komandasını 1/8 finala daşıdı.

Rəqibini iki oyunun nəticəsinə əsasən üstələyən “Viktoriya” (Plzen), FKSB, “Bude/Qlimt”, “Fənərbaxça” və “Alkmaar” da ən güclü 16 komanda sırasına düşdü. Maraq üçün vahid liqa mərhələsini 8 oyuna 3 xalla sonuncu – 36-cı yerdə başa vuran “Qarabağ”ın 6 rəqibinin 1/8 finalda oynayacağını da qeyd edək.

pley-off, cavab oyunları
Real Sosyedad (İspaniya) - Midtüllann (Danimarka) 5:2 (ilk oyun – 2:1)
Mendes, 5. Suçiç, 18; 45+2. Oyarsabal, 73-p. Oskarsson, 90 - Buksa, 24-p. Osorio, 38.
Real Sosyedad: Remiro, Munyos, Agerd, Subeldiya, Elustondo, Suçiç (Marin, 48), Olasaqasti (Turryentes, 67), Mendes, Barreneçea (Zaxaryan, 83), Kubo (Bekker, 67), Oyarsabal (Oskarsson, 83).

Roma (İtaliya) - Portu (Portuqaliya) 3:2 (1:1)
Dibala, 35; 39. Pizilli, 83 – Omorodion, 27. Rensx, 90+6-öz qapısına.
Roma: Svilar, Anxelinyo, Çelik (Əbdülhəmid, 90+2), Mançini, Ndika, Kone, Paredes, Lorentso Pelleqrini (Pizilli, 78), Əl-Şaaravi (Baldantsi, 87), Dibala (Rensx, 87), Şomurodov (Sule, 78).

Ayaks (Niderland) - Yunion (Belçika) 1:2, əlavə vaxtda (2:0)
Teylor, 93-p. - Makallister, 16. Devid, 28-p.
Ayaks: Pasveer, Roza (Qodts, 61), Ruqani (Qaay, 46), Şutalo, Hato, Mokyo (Henderson, 91), Fits-Cim, Klassen, Edvardsen (Kaplan, 46), Berqheys (B.Traore, 46), Rasmussen (Teylor, 41).
Viktoriya (Plzen, Çexiya) - Ferentsvaroş (Macarıstan) 3:0 (0:1)
Yemelka, 27. Şults, 35. Durosinmi, 38.

FKSB (Rumıniya) - PAOK (Yunanıstan) 2:0 (2:1)
Çisotti, 30. Mikulesku, 81.

Bude/Qlimt (Norveç) - Tvente (Niderland) 5:2, ə.v. (1:2)
Hög, 56-p. Hilqers, 90+2-öz qapısına. Vembanqomo, 90+4. Brustad-Fet, 111. Versxuren, 114-öz qapısına – Şevold, 26-öz qapısına. Steyn, 90+6.

Anderlext (Belçika) - Fənərbaxça (Türkiyə) 2:2 (0:3)
Vaskes, 19; 55 - Ən-Nəsiri, 4. Akçiçək, 63.

Qalatasaray (Türkiyə) - Alkmaar (Niderland) 2:2 (1:4)
Osimhen, 56. Şallai, 70 - Maikuma, 42. Kasius, 55.

Bombardirlər: Əl-Kaabi (Olimpiakos) - 7, Ən-Nəsiri (Fənərbaxça), Varqa (Ferentsvaroş), Omorodion (Portu) - 6.