Böyük ehtimalla, “Karvan” da növbəti mövsümdə premyer-liqada mübarizə aparacaq komandalardan biri olacaq. Daha əvvəl Yevlax təmsilçisinin Azər Məmmədovla anlaşdığını, Kənan Kərimovun isə oyun protokollarında köməkçi məşqçi kimi qeyd olunduğunu yazmışdıq.

“Football-plus.az” mövzuyla bağlı əlavə bilgi əldə edib.

Belə ki, klub “Şamaxı”nın 2022/23 mövsümündə istifadə etdiyi təcrübədən yararlanmaq istəyir. Xatırlayırsızsa, o vaxt premyer-liqada çıxış edən komandanı Cavid Hüseynov çalışdırsa da, A kateqoriyalı məşqçi olmadığı üçün rəsmi sənədlərdə baş məşqçi kimi Vüqar Əsgərlinin adı qeyd olunurdu. İndi də Kənan Kərimov A kateqoriyalı məşqçi deyil, rəsmi sənədlərdə komandanın baş məşqçisi kimi Azər Məmmədovun adı yazılacaq.
Bu öz yerində. Bəs, qalan məsələlər necə tənzimlənəcək?

İlk növbədə onu bildirək ki, Kənan Kərimov avqustda A kateqoriyalı məşqçilər sırasına qoşulmağa çalışacaq. Mütəxəssis məqsədinə çatsa, Azər Məmmədov baş məşqçi yox, onun köməkçisi kimi çalışacaq. Alınmasa, hər şey yuxarıda qeyd etdiyimiz formada tənzimlənəcək.

Həmçinin artıq klubla Azər Məmmədov arasında müqavilə imzalanıb. Lakin mütəxəssis hələ komandada iş başında olmayıb. Bunun üçün mövsümün sonunu gözləmək lazım gələcək ki, “Karvan” premyer-liqaya vəsiqə qazansın və növbəti “futbol ili” üçün hazırlığa start verilsin.

KƏNAN BAHADIR