"Neftçi" ölkə kubokunun yarımfinal mərhələsinin ilk oyununda evdə "Sabah"a uduzdu - 1:2.

"Football-plus.az" xəbər verir ki, “ağ-qaralar”ın baş məşqçisi Samir Abasov oyunsonrası mətbuat konfransında jurnalistlərin suallarını cavablayıb.

- Cavab görüşü ərəfəsində komandanın mərhələ adlayacağına inam var?
- Əlbəttə, var. Siz düz vurğulayırsız. Həmin oyuna da qələbə üçün çıxacağıq. İnamım var. Heç olmasa bu oyun üçün bəzi epizodları yaxşılaşdırmalıyıq. Bunları etsək, qalib gələcəyik.

- Hesab etmirisiz ki, kuboku qazanmaq üçün əlinizdəki heyət yetərli deyil?
- Bu başqa mövzudu. 8 tur qalıb. Heyəti incələmək yersiz olar. Biz müəyyən etdiyimiz problemləri bilirik. Statistik baxımdan uçurum boşluqlarımızı bilirik. Bu problemlərin çempionatın sonuna kimi həll olunacağını düşünmürəm. Çempionatın sonunu gözləyək.

- Rusiyalı həmkarınız mətbuat konfransını yarımçıq tərk etdi. Bu gün o 14 nəfərə, yəni üç hakimə qarşı da oynadığını söylədi. Sizcə, bu nə dərəcədə məntiqəuyğundu?
- Mən onların etiraz etdiklərini görürdüm. Hansı epizodlara etiraz etdiklərini bilmirəm. O da emosional insandı. Həmkarım haqqında danışmaq yersizdi.

- Daha çox oyundan, yoxsa keyfiyyətdən narazı qaldız?
- Oyundan narazı qalmadım. Epizodlar yaratdıq. İncələməliyik. Bu haqa hələ ki danışmayım. Bu gün müdafiəmiz bərbad şəkildədi. Bunu “sığortalamaq” lazımdı. Heç olmasa, həddən artıq epizodlar yaradıb, qol vurmaq lazımdı. Əfsuslar olsun ki, bunu da bacarmadıq. Bu bizim problemimizdi.

ƏSƏD SEYİDOV