Uğursuz mövsüm keçirən ''Mançester Siti'' son həftələrdə bir qədər toparlanıb.

''Football-plus.az'' xəbər verir ki, Xosep Qvardiolanın komandası premyer-liqanın 32-ci turunda ''Kristal Pelas'' ilə ev oyununda mükəmməl bir geridönüşə imza atdı. 33-cü dəqiqəyə qədər 0:2 geridə olan ''şəhərlilər'' qalan müddətdə 5 qol vurdular.

Komanda ardıcıl 5-ci rəsmi oyunda uduzmadı ki, bu da ''Siti''nin oktyabrdan bu yana ən yaxşı seriyasıdı. Matçın ən diqqətçəkən məqamlarından biri qapıçı Edersonun aktivinə növbəti məhsuldar ötürməni yazması oldu. Braziliyalı əlcək sahibi Ceyms Makeytinin hesabı 4:2 etdiyi qolda uzun ötürmə ilə aktivinə məhsuldar ötürmə yazdı. ''Sambaçı'' bu mövsüm premyer-liqada artıq 4-cü (!!!) məhsuldar ötürməsini verdi.

Maraqlıdı ki, Ederson bu mövsüm Savinyo (8) və De Bruynedən (7) sonra ''Siti''nin ən çox məhsuldar ötürmə verən 5 futbolçusundan biridi. Doku, Gündoğan, Bernardo Silva və Nunyeşin də aktivində 4 ötürmə var. Ederson özünə məxsus olan rekordu bir qədər də yaxşılaşdıraraq premyer-liqada məhsuldar ötürmələrinin sayını 7-yə yüksəltdi. Bu siyahıda ikinci pillədə 5 ötürmə ilə Pol Robinson, digər pillələrdə isə hərəyə 4 ötürmə verən Devid Simen ilə Pepe Reyna qərarlaşıb.

Bu mövsüm premyer-liqada qapıçılar arasında Edersondan başqa ''Brayton''lu Bart Verbrüggen, ''Brentford''lu Mark Flekken, ''Fulhem''li Bernd Leno və ''Everton''lu Cordan Pikford da hərəyə bir məhsuldar ötürmə verib.