Əla formada olan ''Barselona''nın uğurlu oyunlar seriyası davam edir. ''Barsa'' La Liqanın 29-cu turunda Kataloniyanın digər şəhərini təmsil edən ''Jirona''nı qəbul etdi.

''Football-plus.az'' xəbər verir ki, 60-cı dəqiqəyə qədər hesab 1:1 olsa da, Hans-Diter Flikin kollektivi qalan müddətdə daha 3 top vuraraq 4:1 hesablı inamlı qələbə qazandı. Bununla da ''Barsa'' La Liqada ardıcıl 9-cu qələbəsini əldə etdi.

Bu, 2016-nın yanvar-mart aralığında əldə olunan ardıcıl 12 qələbədən bu yana komandanın çempionatda ən yaxşı seriyasıdı. Rəsmi matçlarda isə Kataloniya nəhəngi qələbə seriyasını 6, məğlubiyyətsiz seriyanı isə 20 oyuna (17 qələbə, 3 heç-heçə) yüksəltdi!

''Blauqrana''nın bu mövsüm xüsusilə məhsuldarlığı göz oxşayır. Təkcə bir faktı vurğulayaq ki, komanda Xavinin başçılığı altında bütün ötən mövsüm ərzində La Liqada 79 qol vurmuşdusa, bu mövsüm artıq 29-cu turdan sonra komandanın aktivində 82 qol var. Ümumilikdə ''Barsa'' bu mövsüm keçirdiyi 45 rəsmi oyuna 139 qol vurub. Bu, La Liqa klubları üçün yeni rekorddu! İndiyə qədər İspaniyanın heç bir klubu mövsümün ilk 45 oyununda bu qədər qol vurmamışdı.

Bu məhsuldarlıq sayəsində ''Barsa''nın hücum oyunçuları sanki qanad açıb uçur. Bu mövsüm Levandovskinin aktivində 38 qol, 3 məhsuldar ötürmə, Yamalın aktivində 13 qol, 17 məhsuldar ötürmə, Rafinyanın aktivində 27 qol, 20 məhsuldar ötürmə, Ferran Torresin aktivində isə 14 qol, 3 məhsuldar ötürmə var. Son matçda dubl edən Levandovski bu mövsüm keçirdiyi 28-ci çempionat oyununda vurduğu qolların sayını 25-ə yüksəltməklə şəxsi rekordunu yenilədi. Buna qədər onun ən yaxşı göstəricisi 23 qol idi (2022/23).

Maraq üçün bildirək ki, La Liqada mövsümün ilk 28 oyununda 25-dən daha çox qol vuran sonuncu futbolçu Lionel Messi olub (2018/19, 29 qol). Levanı yubiley göstəricidən cəmi 3 qol ayırır. O, indiyə qədər ''Barsa''da keçirdiyi 137 rəsmi oyunda aktivinə 97 qol, 20 məhsuldar ötürmə yazıb.