Xviça Kvaratsxeliya ''Napoli''də inanılmaz mövsüm keçirməkdə davam edir. Baxmayaraq ki, bu, onun İtaliyada ilk mövsümüdü.

"Football-plus.az" xəbər verir ki, A seriyasının 27-ci turunda ''Napoli'' səfərdə ''Torino''nu 4:0 hesabı ilə darmadağın etdi.

Penaltidən bir qol vuran gürcü legioner aktivinə məhsuldar ötürmə də yazdı. Xviça bu mövsüm İtaliya çempionatında artıq 12 dəfə fərqlənib və üstəlik 10 məhsuldar ötürmə verib. Bununla da Kvaratsxeliya ''böyük beşlik''də son 16 ildə debüt mövsümündə həm qol, həm də ötürmə sayında ikirəqəmli həddə çatan ilk futbolçu oldu!

Sonuncu dəfə bunu ''Verder''in heyətində Dieqo bacarmışdı. Braziliyalı debüt - 2006/07 mövsümündə bundesliqada 13 qol, 14 məhsuldar ötürməlik performans sərgiləmişdi. Amma həmin vaxt ''sambaçı''nın komandası mövsümü yalnız 3-cü pillədə tamamlamışdı.

''Napoli''nin isə çempion olacağı indidən şübhə doğurmur.