Premyer-liqanın 19-cu turunda ''Mançester Siti'' ''Lester''in qonağı oldu.

Son iki ayda inanılmaz eniş yaşayan ''Siti'' Xosep Qvardiolanın yubileyini korlamadı. ''Şəhərlilər'' Savinyo və Holannın qolları ilə 2:0 hesablı qələbə qazandılar. Komanda 5 oyunluq qələbəsiz seriyanı bitirərək son 14-cü rəsmi oyunda cəmi 2-ci qələbəsini əldə etdi. Bu, Qvardiolanın ''Siti''nin başında 500-cü rəsmi oyunu oldu. O, son 11 ildə bir premyer-liqa klubunun başında 500 oyuna çıxan ilk mütəxəssis oldu.

Sonuncu dəfə bunu 2013-də ''Everton''un başına Devid Moyes bacarmışdı. Bu, ''Siti'' tarixində ikinci göstəricidi. Yalnız 1950-63-cü illərdə çalışmış Les Makdovall ''Siti''nin başında ispaniyalı mütəxəssisdən daha çox (593) oyuna çıxıb. Onu da bildirək ki, ''Siti'' Qvardiolanın başçılığı altında indiyə qədər premyer-liqada keçirdiyi 323 oyunda hamıdan çox - 747 xal toplayıb. Bu müddət ərzində 2-ci pillədəki ''Liverpul'' (322 oyuna) 702 xal, 3-cü pillədəki ''Arsenal'' (322 oyuna) 603 xal toplayıb. Qvardiolanın dönəmində, yəni 2016/17-dən bu yana ''Siti'' ''böyük beşlik''də rəsmi matçlarda ən çox (355) qələbə qazanan komandadı. Bu göstəricidə ikinci pillədə PSJ (319) qərarlaşıb. Amma Qvardiola ''Lester''lə oyundan sonra artıq premyer-liqada çempionluq şanslarının qalmadığını etiraf etdi.

O, mövsümün qalan hissəsində ölkə kuboku və ÇL-ə vəsiqə uğrunda mübarizə aparacaqlarını qeyd edib. Komanda hazırda 31 xalla 5-ci pillədədi və lider ''Liverpul''dan 14 xal geridədi! Özü də nəzərə alaq ki, ''qırmızılar'' bir oyun az keçiriblər.

ƏLİ