Sabiq ulduz futbolçu Raysın qollarında qeyri-adi heç nə görmür
Məlum olduğu kimi Çempionlar Liqasının 1/4 finalında ''Arsenal'' ''Real''ı 3 cavabsız qolla darmadağın etdi.
''Football-plus.az'' xəbər verir ki, oyunun qəhrəmanı Deklan Rays oldu. Buna qədər peşəkar karyerasında cərimə zərbəsindən qol vurmayan 26 yaşlı ingiltərəli yarımmüdafiəçi bu matçda cərimə zərbəsindən birdən-birə iki qol vuraraq gündəmi zəbt etdi.
Həmin gündən bu yana bir çox məşhurlar Raysa tərif yağdırıb. Amma Uesli Sneyder fərqli açıqlaması ilə diqqət çəkib. Niderland yığmasının, eləcə də ''Ayaks'', ''Real'', ''İnter'' və ''Qalatasaray''ın sabiq üzvü hazırda şərhçi kimi çalışır.
Maraqlıdı ki, Sneyder Raysın qollarında qeyri-adi bir şey olmadığını deyib: ''
Bəlkə də bu sözlərim bəzilərinə qəribə görünəcək. Amma topu bu cür fırlatmaq çətin bir şey deyil. Sadəcə topa necə zərbə vurmağı bilmək lazımdı. Bunu bildikdə belə qollar vurmaq asanlaşır. Mənim belə şeylərdən çox yaxşı anlayışım var. Xüsusilə Raysın vurduğu birinci qol çox asan oldu. Sağ ayaqla vuran futbolçuya o mövqedən o cür vurmağa imkan vermək olmaz. Qapıçı ''canlı sədd''i düzgün qurmamışdı. İkinci qolda isə Kurtua özü səhvə yol verdi. Çünki zərbə vurulmamışdan öncə bir qədər sağ tərəfə yönəldi''.
Qeyd edək ki, Sneyder özü də standart zərbələri kifayət qədər yaxşı yerinə yetirirdi. ''Transfermarkt''a inansaq, ulduz futbolçu karyerası ərzində 2-si bir oyunda olmaqla cərimə zərbələrindən ümumilikdə 26 qol vurub.
Digər xəbərlər
