Çempionlar Liqasının 1/4 finalının ilk iki matçı sürpriz hesablarla yekunlaşdı.

''Football-plus.az'' xəbər verir ki, ''Bavariya'' evdə gözlənilmədən ''İnter''ə 1:2 məğlub oldusa, ''Real'' Londonda ''Arsenal'' ilə qarşılaşmada ikinci hissədə buraxdığı qollarla 0:3 hesabı ilə darmadağın oldu. Bu nəticə ilə ÇL-in son qalibi statusunda olan ''kral klubu''nun yarımfinala yüksəlmək şansı faktiki olaraq minimuma endi.

''Emireyts''dəki görüşdə bir sıra maraqlı faktlar qeydə alındı. İlk növbədə ''Real''ın ardıcıl 2-ci ÇL matçında meydanı qolsuz tərk etməsi diqqət çəkdi. Komanda 1/8 finalda ''Atletiko'' ilə səfər oyununda (0:1) da qol vurmamış və yalnız penaltilər seriyasında üstün olmuşdu. Madrid nəhənginin bu turnirdə ardıcıl iki oyunda qol vura bilməməsinə sonuncu dəfə 2009-un fevral-mart aylarında təsadüf olunmuşdu. Həmin vaxt komanda 1/8 finalda ''Liverpul''a həm səfərdə (0:4), həm də evdə (0:1) qol vurmadan uduzmuşdu.

''Arsenal'' - ''Real'' matçına damğa vuran futbolçu Deklan Rays oldu. İngiltərə yığmasının üzvünün cərimə zərbəsindən Tibo Kurtuaya iki qol birdən vurmasını kiçik bir möcüzə də adlandırmaq olar. Çünki bu futbolçu buna qədər peşəkar karyerasında cərimə zərbəsindən heç vaxt (!) qol vurmamışdı. ''Opta''nın məlumatına görə Rays bu oyuna qədər premyer-liqa və avrokuboklarda cəmi 10 dəfə cərimə zərbəsi yerinə yetirmiş və hamısı da uğursuz alınmışdı.

İndiyə qədər ÇL tarixində yalnız 4 futbolçu - Rivaldo, Kriştiano Ronaldo, Neymar və Hakimi bir oyuna cərimə zərbəsindən iki qol vurmuşdu. Amma Rays bunu ÇL-də həm pley-offda, həm də ''Real''a qarşı oyunda bacaran ilk futbolçu kimi tarixə düşdü!