'Qalatasaray''ın sabiq ulduzu Uesli Sneyder sürpriz hərəkətlə gündəmə gəlib. Yaxın keçmişin məşhur futbolçusu Türkiyənin Manisa şəhərinə gəlib.

Football-plus.az xəbər verir ki, niderlandlı sabiq yarımmüdafiəçi Saruhanlı qəsəbəsini ziyarət edib. Məlum olub ki, Sneyder bura taxta və ağacdan müxtəlif formalı əşyalar hazırlayan bir şirkətin tədbirinə qatılmaq üçün gəlib. Sneyder eyni zamanda Saruhanlının bələdiyyə sədri Zəki Bilgini də ziyarət edərək ona öz imzasının olduğu ''Qalatasaray'' formasını bağışlayıb. Daha sonra Sneyder sarı-qırmızı formanı əyninə keçirərək fotomüxbirlərin önünə çıxıb və bu hərəkəti ilə hələ də ''Cim-Bom''a böyük simpatiya duyduğunu göstərib.

Xatırladaq ki, 38 yaşlı Sneyder 2013-ün yanvarından 2017-nin yayına qədər ''Qalatasaray''ın şərəfini qoruyub. İstanbul nəhəngində 2-si çempionluq olmaqla 8 titul qazanan, eləcə də 175 rəsmi qarşılaşmada 45 qol, 44 məhsuldar ötürmə ilə fərqlənən Sneyder klub tarixində iz qoymağı bacarıb. 2019-da karyerasını bitirən Sneyder hazırda vətənində futbol şərhçisi kimi çalışır.