Yurrien Timberin “Ayaks”dan “Arsenal”a gözlənilən keçidi rəsmiləşib. İngiltərə klubu transferin reallaşdığını açıqlayıb.


"Football-plus.az" xəbər verir ki, London klubunun saytı 22 yaşlı niderlandlı müdafiəçi ilə uzunmüddətli müqavilə imzalandığı barədə məlumat yayıb. Böyük Britaniya mətbuatına görə, “Arsenal” bu transfer üçün “Ayaks”a 40 milyon avro ödəyəcək. Timber sabiq klubuna 5 milyon avro bonus da qazandıra bilər. O, yetirməsi olduğu amsterdamlıların əsas komandasında 2019/20 mövsümündə debüt edib. Yurrienin ötən mövsüm Niderland çempionatında 34 oyuna çıxdığını, 2 qol vurub eyni sayda məhsuldar ötürmə verdiyini də xatırladaq.

Onun “Arsenal”a keçidi daha bir futbolçunun transferi ilə müşayiət olunacaq. “Vest Hem”in oyunçusu Deklan Raysın “Arsenal”a keçidi, demək olar ki, reallaşıb. “The Guardian” qəzetinin yaydığı xəbərə görə, ingiltərəli yarımmüdafiəçi ilə müqavilənin tezliklə bağlanacağı gözlənilir. “Arsenal” mümkün bonuslar da daxil olmaqla “Vest Hem”ə 120 milyon funt sterlinq örəyəcək.

Deklan paytaxt komandasında 2017-ci ildən çıxış edir. Bu müddət ərzində 245 oyun keçirib və 15 qol vurub. 24 yaşlı ingiltərəli yarımmüdafiəçi ötən mövsüm “Vest Hem”in qalibi olduğu Konfrans Liqasının ən yaxşı oyunçusu seçilib. Onun komandası finalda “Fiorentina”ya 2:1 hesabıyla qalib gəlmişdi.