“Neftçi” bu gün ölkə kubokunun yarımfinal mərhələsində taleyüklü oyuna çıxacaq.

Premyer-liqada 28 tur ərzində 32 xal toplayan, bu üzdən 4-cü pillədə qərarlaşan “Turan Tovuz”dan 11 xal geridə qalan “ağ-qaralar” avrokuboklarda iştirak etmək istəyirsə, “Sabah”ı mübarizədən kənarlaşdırmaqdan başqa yol görünmür. O başqa məsələ ki, komandanın premyer-liqanı ilk “4-lük”də bitirməklə bağlı riyazi şansları qalır.

Xatırlayırsızsa, paytaxt təmsilçisinin baş məşqçisi Samir Abasov “Araz-Naxçıvan”la matçdan sonra keçirilən mətbuat konfransında qapıçı Rza Cəfərovun zədəli halda meydana çıxdığını, bu üzdən “Sabah”la oyuna qədər yenidən zədəli duruma düşə biləcəyini dedi. Təbii ki, komandanın belə əhəmiyyətli oyunda əsas qapıçısının xidmətindən məhrum olması nəticəyə ciddi təsir edə bilər. Nəzərə alaq ki, hücumçu Bassala Sambu da qırmızı vərəqə cəzalısı olduğuna görə bu gün meydana çıxa bilməyəcək.

“Football-plus.az” matçın önəmini nəzərə alıb, Rzanın son durumuyla maraqlandı. Məlum oldu ki, gənc qolkiper özünü yaxşı hiss edir. Komandanın son məşqçində iştirak edən futbolçunun “Sabah”la matçda qapını qoruyacağı gözlənilir. Xatırladaq ki, bu oyun saat 19.30-da başlayacaq.

KƏNAN BAHADIR