Oktyabrın 26-da La Liqanın 11-ci turunda mövsümün ilk ''El Klasiko''su baş tutdu. ''Real'' doğma ''Santyaqo Bernabeu''da ''Barselona''nı qəbul etdi. Bu turdan öncə Kataloniya nəhəngi 3 xal öndə olduğundan ''Kral klubu'' mütləq 3 xal qazanmaq istəyirdi.

Amma oyun Karlo Ançelotti və onun ulduzları üçün fiasko ilə nəticələndi. İlk yarısı qolsuz başa çatan oyunda ''Barsa'' fasilədən sonra 4 cavabsız qol vuraraq möhtəşəm qələbə qazandı. Dubl edən Levandovski həm oyunun ən yaxşısı seçildi, həm də bu mövsüm çempionatda vurduğu qolların sayını 13-ə yüksəltdi. ''Real'' fanatlarının böyük ümidlər bəslədiyi Kilian Mbappe isə bu oyunda daha çox fürsətləri boşa verməsi və tez-tez ofsayda düşməsi ilə yadda qaldı. Fransalı ulduz oyunboyu 8 dəfə oyundankənar vəziyyətə düşdü.

Mbappe 2017-dən bu yana ''böyük beşlik'' çempionatlarında bir oyunda 7-dən çox ofsayda düşən ilk futbolçu oldu! Ən əsası Madrid nəhənginin La Liqa çərçivəsində 42 oyunluq məğlubiyyətsiz seriyası qırıldı (31 qələbə, 11 heç-heçə). Bununla da ''Real'' məh elə ''Barselona''ya məxsus olan turnirin tarixinin rekordunu təkrarlaya bilmədi. ''Barsa'' 2017-nin aprelindən 2018-in mayına qədər La Liqada ardıcıl 43 oyunda uduzmamışdı (34 qələbə, 9 heç-heçə).

ƏLİ