Dünən ''Joan Qamper'' kubokunda ''Barselona'' ilə ''Monako'' üz-üzə gəldi.

Oyun ''Nou Kamp'' təmirə bağlandıqdan bu yana Kataloniya nəhənginin ev oyunlarını keçirdiyi ''Luis Kompanis'' adına Olimpiya stadionunda baş tutdu. Joan Qamper ''Barsa''nın əfsanəvi prezidentidi. Bu kubok 1966-cı ildən keçirilir. Hər il rəqibi ''Barselona'' özü seçir. ''Monako'' ilk dəfə bu kubok uğrunda oyunda iştirak etdi və dərhal da parlaq qələbə qazandı. Lamin Kamara, Bril Embolo və Kristian Mavissanın qolları sayəsində moneqasklılar 3:0 hesablı sürpriz qələbə qazandılar. Halbuki ''blauqrana'' ABŞ turnesində heç də pis təsir bağışlamamış və ''Mançester Siti'' (2:2), ''Real'' (2:1), ''Milan'' (2:2) kimi rəqiblərin heç birinə əsas vaxtda uduzmamışdı.

Kataloniya nəhəngi 2012-dən bu yana ilk dəfə bu titulu qazana bilmədi. Sonuncu dəfə ''Barsa'' ''Sampdoriya''ya boyun əymiş və o vaxtdan bu yana ardıcıl 11 il ''Joan Qamper''ə sahib çıxmışdı. Komandanın bu kubok uğrunda oyunda ən azı 3 top fərqli məğlubiyyəti isə cəmi 4-cü dəfə qeydə alındı. Sonuncu dəfə buna 1994-də ''Valensiya'' ilə oyunda (1:4) rast gəlinmişdi. Məğlubiyyət azmış kimi ''Barsa'' iki aparıcı oyunçusunu da itirib. Belə ki, Robert Levandovski ilə İlkay Gündoğan zədələnərək meydanı tərk ediblər.

ƏLİ