La Liqada 27-ci turdan təxirə salınan oyunda ''Barselona'' ''Osasuna''nı qəbul etdi.

''Football-plus.az'' xəbər verir ki, Kataloniya nəhəngi əla performans sərgiləyərək ilk dövrdəki məğlubiyyətin qisasını artıqlaması ilə aldı.

Rafinyanın oynamamasına, Levandovskinin isə yalnız ikinci hissədə meydana çıxmasına baxmayaraq ''Barsa'' ciddi problem yaşamadı. Ferran Torres və Olmonun qolları ilə ''blauqrana'' fasiləyə 2 toplu üstünlüklə yollandı. İkinci hissədə isə Levandovski meydana çıxdıqdan 10 dəqiqə sonra fərqlənməklə yekun nəticəni müəyyənləşdirdi. La Liqada bu mövsüm 23-cü qolunu vuran və bombardirlər yarışında liderliyini bir qədər də möhkəmləndirən polşalı forvard 2022/23-dəki göstəricisini təkrarladı.

Qeyd edək ki, ilk dövrədə ''Osasuna'' güclü rəqibini 4:2 hesabı ilə məğlub etmişdi. Beləliklə, La Liqada ardıcıl 8-ci qələbəsini qazanan ''Barsa'' sona 10 tur qalmış ''Real''dan 3 xal önə keçərək vahid liderliyə yüksəldi.

Maraq üçün bildirək ki, XXI əsrdə sona 10 tur qalmış liderdən ən azı 3 xal geridə olan komandanın sonda çempion olmasına 3 dəfə rast gəlinib. Bunu 2014-də ''Atletiko'' (3 xal), 2007-də ''Real'' (5) və 2004-də ''Valensiya'' (4) bacarıb.

Yeri gəlmişkən, ''Barsa'' bu mövsüm 44-cü rəsmi oyununda 33-cü qələbəsini qazandı. Yəni hazırda Hans-Diter Flikin bu klubda qələbə faizi 75-ə bərabərdi. Klub tarixində ən azı 10 oyuna çıxan baş məşqçilər arasında yalnız Luis Enrike daha yüksək (76,2) qələbə faizinə sahibdi.