Bu mövsüm ''Barselona''nın işləri qaydasına düşmək əvəzinə həftələr ötdükcə daha da pisləşir.

“Football-plus.az” xəbər verir ki, dünən Kataloniya nəhəngi La Liqanın 22-ci turunda ''Vilyarreal''ı qəbul etdi. Xavi Ernandesin kollektivi matçın gedişində 2 topluq geriliyi aradan qaldıraraq 3:2 önə keçə bildi. Tərəflər 90-cı dəqiqəyə 3:3-lə daxil oldu. Amma bu dramatik qarşılaşmada son sözü ''sarı sualtı qayıq'' söylədi - 5:3! ''Barsa'' 2024-cü ildə keçirdiyi 8 rəsmi oyuna artıq 19 qol buraxıb. Bu, ''böyük beşlik''də ən pis göstəricidi. ''Barsa'' öz meydanında sonuncu dəfə 5 qolu 1994-cü ildə İspaniya superkuboku çərçivəsində ''Saraqosa'' ilə oyunda (4:5), konkret La Liqada isə 1963-cü ildə ''Real'' ilə görüşdə (1:5) buraxmışdı! Daha bir maraqlı fakt odu ki, ''blauqrana'' ötən mövsüm La Liqada ümumilikdə 46 qol buraxdığı halda, cari mövsüm eyni sayda qolu artıq 22 tura buraxıb. Eyni zamanda Xavi ''Barselona''nın başında 122-ci rəsmi oyunda 26-cı məğlubiyyətlə barışdı. Bu, klub tarixində yerli mütəxəssislər arasında antirekorddu! Buna qədər antirekord (85 oyunda) 25 məğlubiyyət acısı yaşayan Xuan Xose Noqesə məxsus idi.

Müqayisə üçün bildirək ki, Xosep Qvardiola klubun başında 247 rəsmi oyunda yalnız 21 məğlubiyyət yaşamışdı. Bu məğlubiyyətdən sonra ''Barsa'' ilə lider arasında 10 xallıq fərq yarandı. Matçın ardından keçirilən mətbuat konfransında isə Xavi klubun dəyişikliyə ehtiyac duyduğunu bildirərək istefa qərarını açıqladı. Amma o, tutduğu vəzifədən indi yox, mövsümün sonunda ayrılacağını dedi. Beləliklə, iyunun 30-da Kataloniya nəhəngində Xavi dönəmi rəsmən başa çatmış olacaq.

ƏLİ