“Kadillak” “Formula-1” ailəsinə qoşulmaq üçün 450 milyon ödəyib!
“Formula-1” baha əyləncədi. “Kral avtoyarışları” öz qayda-qanunları, pozulmaz sxemləri olan qapalı liqaya, mühafizəkarlıq qalasına bənzəyir.
Düzdü, bəzən burda da istisnalar olur. Məsələn, “Formula-1” rəhbərliyi uzun müddət çempionat iştirakçılarının sayının 11-ə çatdırılmasıyla bağlı ideyaya müqavimət göstərsə də, nəhayət, “buz yerindən tərpəndi”. Amerikanın “Kadillak” komandası iştirakçılar sırasına qoşulmaq üçün 450 milyon dollar üzvlük haqqı ödəyib. “Racingnews365” portalının yaydığı xəbərə görə, bu məbləğ hazırda dünya çempionatında iştirak edən 10 komanda arasında bölüşdürüləcək.
Xatırladaq ki, məhz bu ilin martında “Formula-1” rəhbərliyi “Kadillak”ın 2026 mövsümündən çempionatın 11-ci iştirakçısı olacağını təsdiqləyib. Dünya çempionatında sonuncu dəfə 10-dan artıq komanda 2016-cı ildə çıxış edib.
“Kadillak”ın turnirə qatılmasının başqa komandalara iqtisadi təsiri haqda “Haas”ın sabiq rəhbəri, indi şərhçi kimi çalışan Günter Ştayner də danışıb:
“Bütün detalları bilmirəm, ancaq həmişə o fikirlə olmuşam ki, ortada tort var və biz onu 10 hissəyə bölməliyik. Tort istəyən 11-ci komanda da peyda olursa, onda bütün parçalar balacalaşır, təbii ki, tort böyümürsə. “Formula-1” rəhbərliyinin məqsədi həmişə belə olub ki, mövcud komandalar belə addımların mənfi fəsadlarını hiss etməsinlər. “Kadillak”ın bu məclisə nə gətirəcəyi ilə bağlı informasiyaya çıxış imkanım yoxdu. Ancaq düşünürəm ki, tort böyüyəcək. Qalan 10 komanda əvvəlki qədər qazanacaqsa, niyə də olmasın?!”
Bu arada “Formula-1” komandalarından “Alpin”in icraçı müşaviri Flavio Briatore də maraqlı açıqlama verib. Onun fikrincə, “Ferrari” rəhbərliyi Lüis Hemiltonla müqavilə bağlamaqla səhvə yol verib: “Hemilton “Mersedes”də önəmli uğurlara nail olub, həmçinin komandanın quruluşu, orda gedən proseslər ilə yaxından tanışdı. Mən “Ferrari”nin yerində olsaydım, onu komandaya götürməzdim. Bu komandada onsuz da iki güclü pilot – Şarl Lekler ilə Karlos Sayns var idi. Lüisin parlaq marketinq kampaniyasını bir kənara qoysaq, görərik ki, Şarl təsnifat yürüşlərində özünü ən sürətli və yaxşı pilotlardan biri kimi göstərdi. Karlos isə, necə deyərlər, bərk qozdu. Bu, əla duet idi, ancaq “Ferrari” rəhbərliyinin başqa planı var imiş”.
Dördqat dünya çempionu Maks Ferstappenin atası, sabiq “Formula-1” pilotu Yos Ferstappen də danışıb. Onun dediyinə görə, oğlu artıq çoxdan “Red Bull”da qalmağa qərar verib: “Bu qərarı xeyli əvvəl vermişik. Biz komandaya etibar edirik, ancaq nəsə plan üzrə getməsə, bunun günahı Maksda olmayacaq. Komanda yüksək səviyyəsini qorumalı, maşını daha yaxşı duruma gətirməlidi”.
Digər xəbərlər
