“Kadillak” “General Motors” mühərrikləri ilə başlayacaq
2026-cı ildən “Formula-1” üzrə dünya çempionatının iştirakçıları siyahısına 11-ci komandanın qoşulacağını xəbər vermişdik.
Bəli, həmin komanda “Kadillak” olacaq və “General Motors” şirkətini təmsil edəcək. “Kadillak” ilk iki mövsümdə “Ferrari” mühərrikləri ilə yarışacaq, 2028-ə qədər isə artıq özünün mühərrikini yaradacaq. “General Motors”un prezidenti Mark Russun bununla bağlı fikirləri:
“Avtoidmanın zirvəsi olan “Formula-1” yüksək səviyyə və yenilikçi qərarlar tələb edir. Dünyanın ən nüfuzlu idman yarışında iştirak “General Motors” və “Cadillac” üçün böyük şərəfdi. Bu idman növünü bütün dünyadan olan azarkeşləri üçün daha cəlbedici hala gətirmək, entuziazm ilə yarışmaq istəyirik”.
“Kadillak”ın kimə əsas pilot kimi güvənəcəyi ilə bağlı da xəbər yayılıb. Söhbət “IndyCar” çempionatında yarışan gənc amerikalı Kolton Hertadan gedir.
Xatırladaq ki, “Formula-1” üzrə dünya çempionatında iştirakçıların sayı son 10 ildə ilk dəfə artacaq. Hazırda DÇ-də 10 komanda mübarizə aparır.
Bu arada “Formula-1” üzrə dünya çempionatının rəhbərliyi İtaliya “Qran-pri”si ilə bağlı müqavilə müddətinin 2031-ci ilə qədər uzadıldığını elan edib. Montsa mərhələsi 1950-ci ildən keçirilir. İstisna yalnız 1980 mövsümünə aiddi ki, onda yarış İmolada baş tutub.
Montsa “kral avtoyarışları”nın təqvimində ən sürətli trasslardan biri sayılır. 11 döngəsi olan trassın uzunluğu 5793 metrdi (əsas xətt üzrə).
Digər xəbərlər
