Srağagünün əsas xəbəri “Molde”nin (Norveç) “Qarabağ”ın futbolçusu Nəriman Axundzadəni transfet etmək istəməsi, onun hətta müqavilə bağlamaq üçün Norveçə yollanması haqda oldu.

“Football-plus.az” isə hadisələrin içində olan Tural Əsgərovdan açıqlama aldı, Nərimanın transferinin tamamlanmasının ən azı texniki cəhətdən mümkün olmadığını (bu ölkədə qış “transfer pəncərəsi” dünən bağlandı) üzə çıxardı.

O da sirr deyil ki, “Molde” mövsümün sonuna qədər həmyerlimizi izləyəcək, onu ilk imkandaca transfer etməyə çalışacaq. Bəs bu klubu gənc hücumçu ilə maraqlanmağa sövq edən səbəblər hansılardı, yəni “Molde” Nərimana nə dərəcədə ehtiyac duyur?

Sonuncu dəfə 2022-ci ildə çempion olan “Molde” 2024 mövsümünü 5-ci yerdə başa vurub. Həmin mövsümdə komandanın ən məhsuldar oyunçusu Kristian Eriksen olub. 29 yaşlı hücumçu çempionatda keçirdiyi 28 oyunda 14 qol vurub, 5 məhsuldar ötürmə ilə yadda qalıb. O, nəinki “Molde”nin, həm də Norveç çempionatının bombardiri olub. “Molde”nin daha bir məhsuldar oyunçusu 23 oyunda 12 qol vuran, 4 məhsuldar ötürmə ilə yadda qalan 34 yaşlı Maqnus Eykremdi. Nə Eriksen, nə də Eykrem hücumçudu, ikisi də yarımmüdafiəçidi.

Hücum xəttində yer alan oyunçuların yaşı çoxdu. Fredrik Qulbrandsenin 32, Veton Berişanın 30 yaşı var. İstisna kimi transferi dünən açıqlanan qanalı Cəlal Abdullayini qeyd etmək olar. “Elfsborq”dan transfer olunan 20 yaşlı forvardın “transfermarkt” dəyəri 2,5 milyon avrodu.

Təbii ki, Nərimanı “Molde” üçün faydalı ola bilərdi. Azərbaycan çempionatında yerli oyunçular arasında “qol+ötürmə” göstəricisinə əsasən hamını qabaqlayır. Norveçdə Nərimana mane ola biləsi yeganə amil öyrəşmədiyi hava şəraitidi. Cənublu hücumçu şimal ölkəsinə uyğunlaşmalıdı.

Onu da qeyd edək ki, “Molde” Avropanın top çempionatlarına keçmək yolunda tramplin sayılır. 2017-ci ildə 100 min avroya bu kluba transfer olunan Erlinq Holann hazırda dünyaca məşhur hüçumçudu.

Sonda onu da xatırladaq ki, “yaz-payız” sistemi ilə keçirilən Norveç çempionatında 2025 mövsümü martın 29-da start götürəcək.

MÜZƏFFƏR QULUZADƏ