Bu həftə avrokuboklarda qrup mərhələsinin həyəcanı start götürəcək. “Qarabağ” da Avropa Liqasında mübarizə aparacaq.

"Football-plus.az" xəbər verir ki, “köhlən atlar” qrup mərhələsinin ilk oyununda “Molde” ilə qarşılaşacaq.

Norveç təmsilçisinin Bakıya səfər proqramı bəllidi. “Molde” bu gün axşam saatlarında paytaxtımızda olacaq və “Hyatt Regency” otelində məskunlaşacaq. Norveçdən ölkəmizə komanda ilə birgə üç jurnalist gələcək. Lakin “Molde” Bakıda dəstəksiz qalacaq. Komandanın azarkeşləri ölkəmizə təşrif buyurmayacaq.

Bundan başqa, müdafiəçi Martin Linneslə yarımmüdafiəçi Erlinq Knudtson zədə səbəbindən Bakıdakı matçda iştirak etməyəcək. Bu barədə Norveç mətbuatı məlumat yayıb. Hər iki oyunçu Çempionlar Liqasının pley-off mərhələsinin "Qalatasaray"la cavab görüşündə sıradan çıxıb.