Millətlər Liqasında A Liqasına yüksəlmək uğruna pley-offun cavab oyununda Türkiyə Macarıstanın qonağı oldu.

''Football-plus.az'' az xəbər verir ki, martın 20-də İstanbulda 3:1-lik qələbə qazanaraq kifayət qədər yaxşı üstünlük yaxalayan qardaş ölkənin komandası üçün Budapeştdəki oyun da uğurlu keçdi. Macarlar gözlənildiyi kimi oyuna fəal başlasalar da, komanda erkən qol vura bilmədi.

Türkiyə ilk yarının sonlarında fəallaşaraq ardıcıl qollarla rəqibi şoka saldı. 37-ci dəqiqədə Hakan Çalhanoğlu özü qazandığı penaltini dəqiq yerinə yetirdisə, 39-cu dəqiqədə Arda Gülər komandasının üstünlüyünü artırdı. Türkiyə yığmasında 19-cu oyunda 4-cü qolunu vuran gənc ulduzun qoldan sonra oyun ərzində bir neçə dəfə mübahisə yaşadığı Macarıstanın kapitanı Dominik Soboslaiyə əli ilə ''sus'' işarəsini göstərməsi diqqət çəkdi. Çox çətin duruma düşən macarlar fasilədən sonra heç təsəlli qolunu da vura bilmədilər.

Oyunun son anlarında isə hücuma qoşulan mərkəz müdafiəçisi Əbdülkərim Bardakcı fərqlənərək yekun nəticəni müəyyənləşdirdi - 0:3! Macarıstanın evdə 12 oyunluq məğlubiyyətsiz seriyası qırıldı (9 qələbə, 3 heç-heçə). Son məğlubiyyət 2022-nin sentyabrında ML-qrup mərhələsində İtaliya ilə oyunda (0:1) qeydə alınmışdı.

Beləliklə, Türkiyə yığması tarixində ilk dəfə ML-də A Liqasında oynamağa haqq qazandı. Vinçentso Montella ''ay-ulduzlular''ın başında önəmli zəfərlər əldə etməkdə davam edir. Bu məşqçi ilə Almaniyaya qarşı səfərdə 72 illik, İslandiyaya qarşı səfərdə 43 illik qələbə həsrətinə son qoyan, eləcə də tarixində ilk dəfə səfərdə Xorvatiyanı məğlub edən Türkiyə Budapeşti də son 19 ildə ilk dəfə fəth etdi. Bu rəqibə qarşı səfərdə keçirdiyi son 3 oyunun hamısında uduzan qardaş ölkə Budapeştdə son qələbəsini 2006-nın oktyabrında - AÇ-2008-in seçmə mərhələsində əldə etmişdi (1:0).

Bundan başqa Türkiyə yığması 102 illik tarixi ərzində keçirdiyi 639-cu oyunda yubiley - 250-ci qələbəsini qazandı (150 heç-heçə, 239 məğlubiyyət, top fərqi - 876:912).

ƏLİ