AÇ-2024-də uğurlu çıxış edən Türkiyə yığması Millətlər Liqasında da fanatlarını sevindirməkdə davam edir.

Qardaş ölkənin komandası dünən 4-cü turda Reykyavikdə İslandiyanın qonağı oldu. Çox maraqlı, məhsuldar və hadisələrlə zəngin olan oyunda Türkiyə nəhayət, səfərdə İslandiya lənətinə son qoymağı bacardı. Çünki ''ay-ulduzlular'' buna qədər bu rəqibə qarşı səfərdə keçirdikləri 7 oyunun hamısında qələbəyə həsrət qalmışdılar (1 heç-heçə, 6 məğlubiyyət). Bu dəfə də oyun türklər üçün yaxşı başlamadı və komanda artıq 3-cü dəqiqədə hesabda geri düşdü. Bu azmış kimi ikinci hissənin əvvəllərində qazanılan penalti zamanı Hakan Çalhanoğlu topu tora göndərsə də, işə VAR qarışdı.

Belə ki, zərbə zamanı Hakanın ayağı sürüşdüyündən o, topa iki dəfə toxundu. Bu üzdən qol qeydə alınmadı. İrfan Can Kahveci hesabı bərabərləşdirdikdən sonra qazanılan ikinci penaltidə Hakan yenə topun başına keçdi və bu dəfə qolu qaydalar çərçivəsində vurdu. Düzdü, İslandiya hesabı 2:2 etməyə özündə güc tapdı. Amma son sözü qonaqlar söylədi. Oyunun son anlarına Kərəm Aktürkoğlu damğa vurdu. Əla formada olan ''Benfika''nın üzvü əvvəlcə 88-ci dəqiqədə qapıçıya pressinq edərək Arda Gülərin topu boş qapıya göndərməsinə şərait yaratdı. Əsas vaxta əlavə olunmuş 5-ci dəqiqədə isə Kərəm mükəmməl aşırma zərbə ilə topu uzaq küncə göndərdi.

Beləliklə, 4:2 üstün olan Türkiyə xalını 10-a yüksəldərək qrupda vahid liderliyini davam etdirdi. Maraqlısı budu ki, Türkiyə İslandiyaya qarşı buna qədər səfərdə keçirdiyi 7 oyuna ümumilikdə 3 qol vurmuşdusa, bu dəfə bir oyuna 4 qol vurdu!

ƏLİ