Millətlər Liqasında A Liqasına yüksəlmək uğrunda pley-offun ilk oyununda Türkiyə Macarıstanı qəbul etdi.

''Football-plus.az'' xəbər verir ki, ''Rams Park''da oynanılan qarşılaşma ''ay-ulduzlular'' üçün uğurlu alındı.

İlk yarıda qarşılıqlı qollar qeydə alındı. Meydan sahiblərinin heyətində ''Benfika''lı Orkun Kökçünün erkən qoluna qonaqların heyətində 25-ci dəqiqədə Andres Şafer cavab verdi. Ancaq qardaş ölkə fasilədən sonra rəqibin müqavimətini qıra bildi. Karyerasını ''Benfika''da davam etdirən daha bir ulduz - Kərəm Aktürkoğlu 69-cu dəqiqədə Türkiyəni yenidən önə keçirdi. Çox keçmədən İrfan Can Kahveci də qol vuraraq yekun nəticəni müəyyənləşdirdi. ''Fənərbaxça''nın yarımmüdafiəçisi oyuna daxil olduqdan sonra faktiki olaraq ilk toxunuşdaca topu tora göndərdi.

Oyunu 1 qol, 1 məhsuldar ötürmə ilə tamamlayan Kərəmdən başqa ''Fənər''li Oğuz Aydın da matçın qəhrəmanlarından oldu. Yığmada ilk dəfə rəsmi oyunda start heyətində meydana çıxan bu futbolçu ilk iki qolda aktivinə məhsuldar ötürmə yazdı.

Beləliklə, Türkiyə həm martın 23-də keçiriləcək cavab oyunu ərəfəsində yaxşı üstünlük əldə etdi, həm də Macarıstana qarşı 18 illik sindroma son qoydu. Belə ki, ''ay-ulduzlular'' bu rəqibi sonuncu dəfə 2007-ci ildə məğlub etmişdilər. Daha sonra keçirilən 5 oyunun 4-də macarlar sevinmişdisə, 1 oyunda heç-heçə qeydə alınmışdı.

Vinçentso Montella isə Türkiyənin başında önəmli göstəricilər yaxalamaqda davam edir. O, bu komandanın tarixi ərzində ilk 5 ev oyununda məğlubiyyət acısı yaşamayan (4 qələbə, 1 heç-heçə) cəmi 2-ci əcnəbi mütəxəssis oldu. İlk belə məşqçi Quus Hiddink olmuşdu. Türkiyə Hiddinkin dönəmində ilk 6 ev oyununda uduzmamışdı.

ƏLİ