Türkiyə çempionatının son turu növbəti məşqçi istefası ilə əlamətdar oldu.

"Football-plus.az" xəbər verir ki, “Hatayspor” Rza Çalımbayla yollarını ayırdı. Bu komanda son turda öz meydanında aşkar autsayder “Adana Dəmirspor”a boyun əymişdi. Final fitindən sonra fanatlar təcrübəli mütəxəssisi istefaya səsləmişdi. Türkiyə çempionatında ən çox oyun keçirən məşqçi statusunda olan Çalımbay komandanın başına 5-ci turda gətirilmişdi.

Həmin vaxt “Hatayspor” 4 turdan sonra topladığı 1 xalla sondan əvvəlki – 18-ci pillədə qərarlaşmışdı. Aradan 3 aydan çox vaxt keçsə də, dəyişən bir şey yoxdu. Komanda hələ də 18-ci pillədədi. “Hatayspor” 61 yaşlı mütəxəssisin dönəmində 15 rəsmi oyundan 3 qələbə, 5 heç-heçə, 7 məğlubiyyətlə ayrıldı ki, bu qələbələrdən 2-si kubokda aşağı liqa təmsilçiləri ilə oyunlarda qazanıldı. Yəni çempionatda komandanın hamıdan az – cəmi 1 qələbəsi var. Hətta sonuncu pillədəki “Adana Dəmirspor”un belə 2 qələbəsi var. Çalımbayın yerinə Bülənt Korkmazın gələcəyi barədə iddialar var. Amma hələ ki rəsmi təyinat baş tutmayıb. Bu, 17 turu arxada qalan Türkiyə çempionatında cari mövsüm 12-ci məşqçi istefası oldu! 19 komandadan 10-u artıq məşqçi dəyişikliyinə gedib. “Adana Dəmirspor”la “Hatayspor”da 2 dəfə məşqçi dəyişib. Hatay klubu mövsümə Özhan Pulatın rəhbərliyi altında başlamışdı. Hələ ki, 9 klub – “Qalatasaray”, “Fənərbaxça”, “Samsunspor”, “Göztəpə”, “Eyüpspor”, “İstanbul BŞ”, “Qaziantep”, “Antalyaspor”, “Çaykur Rizəspor” məşqçi dəyişikliyinə getməyib. İstefalar baxımından Türkiyə Avropada açıq fərqlə öndədi. Son 5 mövsümdə Türkiyənin elitasında 127-ci (!) dəfə bir məşqçi öz klubundan ayrıldı. Bu müddətdə ən qeyri-sabit klub 11 məşqçi dəyişən “Kasımpaşa”dı. Digər pillələrdə “Kayserispor” (10), “Beşiktaş” (8) və “Konyaspor” (8) qərarlaşıb.

Yeri gəlmişkən, “Hatayspor”da tək baş məşqçi yox, prezident də istefa verib. Bu ilin iyunundan bu vəzifəni icra edən Levent Mıstıkoğlu yazılı açıqlama ilə prezidentlikdən ayrıldığını bildirib.