"Zirə" Misli premyer-liqasının 25-ci turu çərçivəsində keçirilən matçda "Turan Tovuz"un meydanından qalib ayrıldı - 2:0.

"Qartallar"ın kapitanı və ilk qolunun müəllifi Qismət Alıyev oyundan sonra "Football-plus.az"ın suallarını cavabladı.

- Komanda ikinci pillədəki mövqeyini möhkəmləndirdi. Oyun haqda fikirlərin necədi?
- Tovuz səfəri bütün komandalar üçün ağırdı. "Qarabağ" da daxil olmaqla... Çətin sınaqla üz-üzə olduğumuzu bilirdik. Oyuna çox istəklə hazırlaşmışdıq. Vacib üç xal qazandıq. İndi "Səbail"lə oyuna hazırlaşmaq vaxtıdı.

- Əlverişli mövqedə qərarlaşmağınız kollektivdə arxayınlıq yarada bilərmi?
- Hər komanda eniş-yoxuşlu yollardan keçir. Biz də birinci dövrədə istədiyimiz nəticələri qazana bilməmişdik. Heç bir matçda asanlıqla qələbə qazanmaq mümkün deyil. Hansısa arxayınlıqdan söhbət gedə bilməz. Düzdü, növbəti matçda qarşılaşacağımız "Səbail" sonuncu sıradadı. Lakin bu komandanın oyundan-oyuna inkişaf etdiyi göz önündədi. Qısası, bizi qarşıda bir-birindən çətin oyunlar gözləyir.

- Səncə, bu matçda nəticəni hansı məqamlar müəyyənləşdirdi?
- "Turan Tovuz" 0:2 geridə olanda belə hücumlar edirdi. Hansısa qırılma nöqtəsindən danışmaq doğru olmaz. Son ana qədər gərgin mübarizə şəraiti hökm sürdü. Hər halda, bu gün səhvə yol vermədik.

- Ölkə kubokunda mübarizəni dayandırmağınız gözlənilməz oldu. "Araz-Naxçıvan"a bir qol belə vura bilmədiz...
- "Araz-Naxçıvan" hər iki matçda müdafiə planında çox yaxşı çıxış etdi. Təbii ki, bu yarışda daha da irəliləmək istəyirdik. Ötən mövsüm finala qədər irəliləmişdik. Lakin rəqibimiz gözlənilmədən penaltidən vurduğu qollar sayəsində üstünlük qazandı. İndi fikrimizi premyer-liqaya yönəltmişik.

KƏNAN BAHADIR