"Zirə" Misli premyer-liqasının 18-ci tur matçında "Səbail"in meydanından minimalhesablı qələbəylə ayrıldı - 1:0.

"Football-plus.az" xəbər verir ki, "qartallar"ın baş məşqçisi Rəşad Sadıqov oyunsonrası mətbuat konfransında jurnalistlərin suallarını cavablandırdı.

- İlin son matçı idi. Çox vacib qarşılaşmada qələbə qazana bildik. Belə görüşlər xüsusi olur. Ona görə ki, futbolçular istirahətə hazırlaşır. Belədə oyuna köklənmək çətin olur. "Səbail" əzmkar çıxışla yadda qaldı. Matçın ağır keçəcəyini bilirdik. Çox şükür, lazım olan qolu vurduq. 3-cü və 4-cü dövrənin qarşılaşmalarına daha yaxşı hazırlaşmalıyıq. Çünki çempionatımızda mövsümün ikinci yarısı həmişə çətin keçir. Bundan sonra hər xal çox vacib olacaq.

- Futbolçuların performansından nə dərəcədə razı qaldız?
- Kombinasiyalı hücumlar həyata keçirdik. Təəssüf ki, həmin epizodlar qolla nəticələnmədi. "Səbail"i məğlub etmək asan deyil. Səfərdə və süni ot örtüyündə oynamaq əlavə problemlər yaradır. Birinci hissədə dominant oyun sərgiləsək də, ikinci yarıda fasilələr yarandı. Matçın dinamikası çox aşağı düşdü. Ən əsası odu ki, vurduğumuz qoldan sonra meydanda istədiyim futbolu gördüm. Komandalar daha fəal oynadı. Bəzi matçlarda arzuladığın kimi çıxış etməsən də, qələbə qazanırsan. Bu oyun da onlardan biri oldu.

- Sizcə, "Səbail"lə matç futbolçuları qiymətləndirmək üçün meyardımı?
- Sonuncu pilləni tutan komanda 1-ci liqaya düşməyə başlayandan sonra çempionatda rəqabət artıb. Xatırlayırsızsa, "Kəpəz"ə 4:0 hesabı ilə qalib gəldik. Amma həmin matçda bugünkündən yaxşı oynadığımı düşünmürəm. Komandalar arasında qərarlaşdığı pillədən asılı olmayaraq fərq görmürəm. Gərgin oyunlar olur. Məncə, belə hallar premyer-liqanın inkişaf etməsinə səbəb olacaq.

- Sizcə, ilin ən yaxşı futbolçusu kimdi?
- Düzü, bu haqda düşünməmişəm. Fikirləşmək, komandakların avrokubok oyunlarını xatırlamaq lazımdı. Mənə elə gəlir ki, Toral Bayramovla Elvin Cəfərquliyev arasında ciddi rəqabət olacaq. Mahir Emreli də namizədlərdən ola bilər. Qismət Alıyev də yaxşı performansla yadda qalmaqdadı.

KƏNAN BAHADIR