Misli premyer-liqasının 11-ci turu haqda nə demək olar? İlk növbədə aşağı məhsuldarlığı qeyd etməliyik. 5 oyunda cəmi 9 qol vuruldu. Özü də 6 qol iki oyunun payına düşdü. Söhbət statistikadan yox, nəticələrdən gedirsə...

Tur Tovuzda keçirilən “Turan Tovuz” – “Kəpəz” oyunu ilə start götürdü. Qərb derbisini tribunalarda cəmi 3800 azarkeş izləyirdi. Baxmayaraq ki, bu da turun rekordudu. Kurban Berdıyevin də etiraf etdiyi kimi, komandası cari mövsümdə ən pis oyununu göstərsə də, qələbə qazana bildi. Bu oyundan sonra hakimliklə bağlı da söz-söhbət yarandı. Rauf Allahverdiyevin idarəçiliyi, yumşaq desək, bu oyunun statusuna uyğun deyildi.

Cari mövsümdə yalnız “Qarabağ”a məğlub olan “Araz-Naxçıvan” “Zirə” ilə oyunda 1 xalla kifayətləndi. Hər şey “qartallar”ın qələbəsinə doğru apararkən onların müdafiəçisi Mutsinzi hoqqabazlıq etdi. Bəli-bəli, topa bu şəkildə əllə toxunmağın başqa adı yoxdu. “Zirə” ardıcıl 3-cü oyunda qələbə qazana bilməməyin cəzasını Mutsinziyə kəsməlidi.

Baş məşqçi kimi elitada ikinci oyununa çıxan Vaqif Cavadov özündən qat-qat təcrübəli Şahin Diniyevi məyus etdi. Ardıcıl 7 turda qələbə qazana bilməyən “gənclik şəhəri”nin təmsilçisi tilsimi “Səbail”lə oyunda qırdı. “Kimyaçılar” qələbə hesabına həm “Neftçi”ni, həm də “Səbail”i arxada qoydu, “Şamaxı”ya isə yaxınlaşdı.

Masazırda hər iki komanda 1 xalla kifayətləndi. “Neftçi” ötən tur yeni baş məşqçisi Samir Abasovun rəhbərliyi altında keçirdiyi ilk oyunda qələbə qazansa da, bu dəfə 3 xal almaq mümkün olmadı. Paytaxt derbisində qalib müəyyənləşmədi. “Sabah” bu oyunda qələbə qazansaydı, turnir cədvəlində “Zirə”ni qabaqlayacaqdı.

Turun son oyununda “Qarabağr” “Şamaxı”ya rəhm etmədi. Qurban Qurbanov heyətdə müəyyən dəyişikliklər etsə də, hətta Zubiri ehtiyatda saxlasa da, komandası 3 xalı 3 qolla qazandı. “Şamaxı” ardıcıl 3 oyundu qələbəyə həsrətdi.

Misli premyer-liqası
2-ci dövrə, 11-ci tur
25 oktyabr
Turan Tovuz – Kəpəz 2:1
26 oktaybr
Araz-Naxçıvan – Zirə 1:1
Səbail – Sumqayıt 0:1
27 oktyabr
Sabah – Neftçi 0:0
Qarabağ – Şamaxı 3:0
1. Qarabağ 10 9 0 1 28-6 27
2. Turan Tovuz 11 7 3 1 18-9 24
3. Araz-Naxçıvan 10 6 3 1 13-10 21
4. Zirə 10 5 2 3 16-8 17
5. Sabah 11 4 5 2 20-16 17
6. Şamaxı 10 3 3 4 8-11 12
7. Sumqayıt 11 3 1 7 9-15 10
8. Neftçi 11 1 6 4 9-16 9
9. Səbail 11 2 1 8 15-21 7
10. Kəpəz 11 1 0 10 7-31 3

Bombardirlər: Cesse Sekidika (Sabah) – 6, Coy-Lens Mikels, Felipe Santos (Sabah) – 5.
Növbəti turun proqramı:
1 noyabr, 18.30. Turan Tovuz – Qarabağ
1 noyabr, 20.30. Neftçi – Araz-Naxçıvan
2 noyabr, 15.00. Şamaxı – Zirə
3 noyabr, 16.00. Kəpəz –Səbail
3 noyabr, 19.00. Sumqayıt – Sabah

ƏSƏD SEYİDOV