“Rubiales işi” ilə bağlı hökm verildi
İspaniya Kral Futbol Federasiyasının (RFEF) sabiq prezidenti Luis Rubiales bu ölkənin qadınlardan ibarət yığmasının oyunçusu Cennifer Ermosonu öpdüyünə görə açılan cinayət işinin sonunda həbs cəzasından qaça bilib.
"Football-plus az" xəbər verir ki, Mərkəzi Cinayət Məhkəməsi futbol məmurunu seksual zorakılıqda günahkar sayıb.
RFEF prezidentinin iştirakçısı olduğu qalmaqal 2023-cü ilin avqustunda - qadınlar arasında dünya çempionatının medallarının təqdimat mərasimində yaşanıb. Onda İngiltərəni 1:0 hesabıyla məğlub edən İspaniya yığmasının üzvlərini çempionluq münasibəti ilə təbrik edən Rubiales Ermosonun dodağından öpmüşdü. Sonradan Cennifer bildirdi ki, bu hərəkət ona xoş gəlməyib, öpüş onun razılığı olmadan baş tutub.
İctimaiyyətin narazılığından, qınağından, FİFA-nın 90 günlük cəzasından sonra Rubiales postunu tərk etdi. Amma o, ittihamla və üzərinə yağan tənqidlə razılaşmadı:
“Bu, sosial qətldi. Haqq etmədiyim halda mənim ovuma çıxıblar”.
Elə həmin ilin sentyabrında Ermoso Rubialesi məhkəməyə verdi. FİFA ispaniyalı funksionerin futbolla bağlı istənilən fəaliyyətlə məşğul olmasına üçillik qadağa qoydu.
Futbolçu məhkəmədə belə deyib:
“Rubiales güclə başımı tutdu. Heç bir reaksiya göstərə bilmədim. Bu hadisə saniyənin mindəbiri ərzində baş verdi. Özümü itirdim. Bossun məni opdüyünü anladım. Bu hadisə baş verməməliydi. Özümə hörmətsizlik hiss etdim. Rubiales həyatımdakı ən xoşbəxt günlərdən birini korladı. Prezidentdən belə hərəkət gözləmirdim. Mənə hörmətsizlik göstərdi”.
Rubiales isə özünə bəraət qazandırmaq üçün deyib ki, dünya çempionatında qələbə şərəfinə istənilən futbolçunu öpərdi:
“Hər gün dünya çempionatını qazanmaq olmur ki... Bu, qeyri-adi hadisə idi. Qızlarımı da heç də həmişə öpmürəm. Ancaq ilin sonunda və ya onlar imtahanları uğurla verəndə öpürəm. Millətlər Liqasında qələbədən sonra bəzi oyunçuları ölənə qədər öpərdim”.
Nəhayət, fevralın 20-də məhkəmə hökm çıxardı – Rubiales Ermosoya münasibətdə seksual zorakılığıa görə günahkar bilindi. Ancaq ona prokurorun tələb etdiyi 2,5 illik həbs cəzası verilmədi. Rubiales hər gün 20 avro olmaqla 18 ay cərimə ödəyəcək. Bundan başqa, Luisə Cenniferə 200 metrdən yaxın məsafədə dayanmaq qadağan olundu.
Bundan başqa, məhkəmə Rubialesin, eləcə də qadınlardan ibarət yığmasının sabiq baş məşqçisi Xorxe Vildanın üzərindən Ermosoya ifadəsini dəyişməklə bağlı təzyiq göstərmək ittihamını götürdü. Yəni bu ittiham təsdiqini tapmadı.
Məhkəmənin axarı ilə bağlı yazı paylaşan “Marca” qəzeti onu da bildirir ki, Rubiales bu qərardan Ali Məhkəməyə şikayət edə bilər.
Digər xəbərlər
