Səudiyyə Ərəbistanı çempionatının 22-ci turunda ''Əl-Nəssr''' ''Əl-Vehda''nın qonağı oldu.

''Football-plus.az'' az xəbər verir ki, ilk yarısı qolsuz bitən və qonaqlar üçün heç də asan keçməyən oyunda Kriştiano Ronaldo növbəti dəfə liderlik keyfiyyətlərini ortaya qoydu.

40 yaşlı portuqaliyalı superulduz ikinci hissənin əvvəllərində fərqlənməklə qələbənin əsasını qoydu. Futbol tarixinin ən məhsuldar oyunçusu statusunda olan Ronaldo peşəkar karyerasının 925-ci qolunu vurdu. Oyunun sonlarına yenə də ''Qızıl top''un beşqat qalibinin hərəkəti damğa vurdu. Son saniyələrdə Kriştiano penalti qazandı və təbii ki, hər kəs onun özünün topun başına keçəcəyini düşünürdü. Amma Ronaldo son 8 oyunda qol vura bilməyən komanda yoldaşı Sadio Maneyə mühüm bir jest edərək zərbə vurmaq hüququnu ona verdi! Halbuki Ronaldo 1000 qola bir qədər də yaxınlaşa bilərdi.

Yaxın keçmişdə ''Liverpul''un heyətində xarüqələr yaradan seneqallı Mane fürsəti boşa vermədi və qolu məhz Ronaldoya həsr etdi. Son 2 rəsmi matçda qalib gələ bilməyən Ər-Riyad təmsilçisi bu zəfər sayəsində xalını 47-yə yüksəldərək 3-cü pillədəki ''Əl-Qədisiyə''yə çatdı. Aktivində 55 xal olan lider ''Əl-İttihad'' öz oyununu bu gün keçirəcək.

ƏLİ