Dünən Səudiyyə Ərəbistanı çempionatının 4-cü turunda ''Əl-Nəsr'' ''Əl-İttifaq''ın qonağı oldu.

Stefano Pioli ''Əl-Nəsr''in başında debüt oyununa çıxdı. Bilindiyi kimi bir neçə gün öncə uğursuz nəticələr üzündən portuqaliyalı Luiş Kaştro istefaya göndərilmiş və onu Pioli əvəzləmişdi. Yaxın keçmişdə ''Milan''la çempionluq sevinci yaşamış italiyalı mütəxəssisin debütü uğurlu alındı.

Kriştiano Ronaldo ilk yarıda penaltidən fərqlənməklə qələbənin əsasını qoydu. Onun komandası fasilədən sonra daha iki top vuraraq inamlı qələbə qazandı. Peşəkar karyerasında 902-ci qolunu vuran portuqaliyalı superulduzun indiyə qədər ''Əl-Nəsr''də penalti qaçırmaması diqqət çəkir. O, bu klubda yerinə yetirdiyi 16 penaltinin hamısını qola çevirib! Ümumilikdə Ronaldonun indiyə qədər karyerasında vurduğu 195 penaltidən 165-i dəqiq alınıb.

Maraq üçün bildirək ki, Lionel Messi karyerası ərzində 140 penaltidən 109-nu dəqiq yerinə yetirib.

ƏLİ