İtaliya çempionatının 26-cı turuna ''Leççe'' - ''Udineze'' oyunu ilə start verildi.

''Football-plus.az'' xəbər verir ki, bu qarşılaşmada penalti zamanı yaşananlar böyük müzakirələrə səbəb oldu. Yarım saatın tamamında udinelilər penalti qazandılar və bütün həngamə də məhz bundan sonra başladı. Komandanın ən məhsuldar oyunçusu və forvardı Lorentso Lukka topu əlinə götürərək zərbəni yerinə yetirmək istədiyini dedi. Amma ''Udineze''nın ştatlı penalti vuranı fransalı Florian Tovendi.

Kapitan sarğısını da daşıyan Toven bu duruma etiraz edərək topu Lukkanın əlindən almaq istədi. Ancaq bunu nə o bacardı, nə də digər komanda yoldaşları. Tovenlə Lukka arasında münaqişə hətta əl-qol hərəkətlərinə qədər yüksəldi. Bu sırada hakim Lukkaya sarı vərəqə də göstərdi. Yaşanan bu gərginliyin ardından Lukka istəyinə çatdı və digər oyunçular geri çəkildi. 24 yaşlı futbolçu zərbəni dəqiq yerinə yetirərək bu mövsüm A seriyasında 10-cu qolunu vurdu. Amma qoldan sonrakı anlar heç də onun istədiyi kimi olmadı.

Belə ki, komanda yoldaşlarından heç kim onu təbrik etmədi və bu futbolçuya yaxınlaşmadı. Qolu təklikdə qeyd etməsi azmış kimi çox keçmədən o, əvəzləndi. Təbii ki, əvəzləndikdən sonra da ehtiyat skamyada uzun müddət onunla baş məşqçi arasında söz davası davam etdi. Maraqlıdı ki, bu, oyunda vurulan yeganə qol oldu və ''Udineze'' minimal hesabla qalib gəldi.

ƏLİ