Türkiyə çempionatında artıq 27 tur arxada qalıb.

"Football-plus.az" xəbər verir ki, diqqətçəkən məqamlardan biri penaltilərin bolluğudu. Geridə qalan 270 oyunda qapılara 100 penalti təyin olunub! Bunlardan 77-si qolla nəticələnib. “Fənərbaxça” 14, “Qalatasaray” isə 11 penalti qazanmaqla turnir cədvəlində olduğu kimi, bu göstəricidə də ilk iki pillədə qərarlaşıb. Həm “sarı-lacivərdlilər”, həm də “sarı-qırmızılar” bu mövsüm penaltidən eyni sayda – 9 qol vurub. Ən çox penalti qazanan klubların siyahısında növbəti pillələrdə “Samsunspor” (7) və “Hatayspor” (7) qərarlaşıb. Digər nəhənglərdən “Beşiktaş” 4, “Trabzonspor” isə yalnız 1 dəfə penalti qazanıb. “Beşiktaş” 4 zərbədən 2-ni, “Trabzonspor” isə yeganə zərbəni qola çevirib. Hakimlər arasında ən çox penalti təyin edən Abdulkadir Bitigendi. 40 yaşlı ədalət təmsilçisi ən son “Antalyaspor”a qarşı oyunda “Qalatasaray”ın xeyrinə 2 penalti vermişdi. Bitigen təyinat aldığı 14 qarşılaşmada 11 dəfə “nöqtə”ni göstərib. İkinci pillədə 13 oyunda 7 penalti verən Bahattin Şimşək yer alır. Futbolçular arasında penaltidən ən çox qol vuran Mauro İkardidi. “Qalatasaray”ın argentinalı ulduzu bu mövsüm superliqada 6 penaltinin hamısını dəqiq yerinə yetirib. Onu 5 penaltinin hamısını dəqiq vuran artıq sabiq “Konyaspor”lu Sokol Çikalleşi izləyir. İşin ən maraqlı tərəfi odu ki, 2022/23-də də 27-ci turdan sonra qapılara eynilə cari mövsümdəki kimi 100 penalti təyin olunmuşdu! O vaxt mövsümün bu hissəsinə qədər “Fənərbaxça” 15, “Konyaspor” 7, “Ümraniyəspor”, “Beşiktaş”, “Adana Dəmirspor”, “Fatih Karagümrük”, “Kayserispor”, “Qalatasaray” və “Trabzonspor” isə 6 penalti qazanmışdı.