Dünən Türkiyə kubokunun 1/8 finalında ''Qalatasaray'' doğma fanatları önündə 1-ci liqa təmsilçisi ''Bandırmaspor''u qəbul etdi.

Məhsuldar keçən görüşdə sürpriz qeydə alınmadı və İstanbul nəhəngi rəqibini 4:2 hesabı ilə məğlub etdi. Karlos Vinisiusun ilk oyundaca qol hesabını açması diqqət çəkdi.

''Cim-Bom''un ''Fulhem''dən icarəyə götürdüyü braziliyalı hücumçu start heyətində meydana çıxdı və əsas vaxta əlavə olunmuş 5-ci dəqiqədə fərqlənərək yekun nəticəni müəyyənləşdirdi. Matçın ən diqqətçəkən anı isə meydan sahiblərinin qazandığı ilk penaltidən sonra yaşandı. Həmin an hesab 1:0 idi və qonaq qapıçının Zahaya qarşı kobudlugundan sonra hakim monitora baxaraq penalti təyin etdi. Zərbəni vurmaq istəyən 3 futbolçu - Barış Alpər Yılmaz, Tete və Xəlil Dərvişoğlu arasında qeyri-adi adi anlar yaşandı. Onlar penalti nöqtəsinin üzərində dayanaraq topa yaxınlaşacaq futbolçunu ''daş, kağız, qayçı'' oyunu ilə seçdilər!

Əllə oynanılan və bəzən ''bir, iki, üç'' də adlandırılan bu oyunun qalibi Xəlil oldu. Bu futbolçu 36-cı dəqiqədə penaltini dəqiq yerinə yetirərək fərqi 2 topa yüksəltdi. Maraqlıdı ki, bir neçə dəqiqə sonra ''Qalatasaray'' daha bir penalti qazandı. Bu penaltilər oyundan sonra ''Bandırmaspor''un ciddi etirazına səbəb oldu. Bu dəfə Xəlil Dərvişoğlu geri çəkildi. Zərbəni vurmaq uğrunda Tete və Barış Alpər Yılmaz arasında kiçik bir münaqişə yaşandı. Braziliyalı futbolçu zərbəni özü vurmaq istədi və topu komanda yoldaşına vermədi. Məyus durumda olan Barışa isə Zaha ilə Sançes təsəlli verdi. Tete zərbəni dəqiq yerinə yetirdi. Bundan başqa ikinci hissədə Zahanın əvəzlənərkən Okan Buruka etiraz etməsi də diqqətdən qaçmadı.

ƏLİ