Bu mövsüm sərgilədiyi performansla ''Qalatasaray''ın liderlərindən birinə çevrilən Yunus Akgünün zədəsi ilə bağlı məlumat var.

''Football-plus.az'' xəbər verir ki, 24 yaşlı vinger Avropa Liqasında ''Ayaks''la səfər matçında zədə almış, ''Qaziantep'', ''Boluspor'' və son olaraq ''Adana Dəmirspor''a qarşı yarımçıq qalan oyunu buraxmalı olmuşdu.

Türkiyə mətbuatının yazdığına inansaq, Yunus zədə üzündən ən azı qarşıdakı iki oyunda da komandasına yardım edə bilməyəcək. Söhbət cümə axşamı AL-in pley-offunda səfərdə ''Alkmaar''a və həftəsonu superliqanın 24-cü turunda səfərdə ''Çaykur Rizəspor''a qarşı baş tutacaq oyunlardan gedir.

Müalicəsi sürətlə davam etdirilən Türkiyə yığmasının üzvünün gələn həftəiçi ''Alkmaar''a qarşı cavab oyununda meydana çıxacağı güman edilir. Bu da baş verməsə, Yunus ən pis halda 25-ci turda ''Fənərbaxça''ya qarşı derbidə forma geyəcək.

Akgün bu mövsüm 30 rəsmi oyunda 11 qol, 7 məhsuldar ötürməlik performans sərgiləyib.

ƏLİ