Yunus Akgünün ''Qalatasaray''ı tərk edəcəyi ilə bağlı xəbərlər təsdiqini tapıb.

“Football-plus.az” xəbər verir ki, istedadlı vinger karyerasını İngiltərədə davam etdirəcək. O, 500 min avro qarşılığında çempionşip təmsilçisi ''Lester''ə transfer olunub. ''Qalatasaray''ın rəsmi açıqlamasında qeyd olunub ki, şərtlərdən asılı olaraq ''Lester''in gələn yay 9 milyon avro ödəməklə bu futbolçunu daimi əsasda transfer etmək haqqı var. Amma söhbətin hansı şərtlərdən getdiyi məlum deyil. 23 yaşlı Yunus Akgün ''Qalatasaray''ın öz yetirməsidi. 2018-ci ildən əsas komandada olan solaxay futbolçu 2020-22-ci illəri icarə əsasında ''Adana Dəmirspor''da keçirmişdi. Bu klubda parlaq oyun nümayiş etdirdikdən sonra ''Cim-Bom'' ötən yay onu böyük ümidlərlə yenidən heyətə qaytarmışdı. Amma Yunus zaman-zaman parlasa da, ümumilikdə ''Qalatasaray''da ümidləri doğrulda bilmədi. O, İstanbul nəhəngində 61 rəsmi oyunda 6 qol, 8 məhsuldar ötürməlik performans sərgilədi. Xatırladaq ki, yaxın keçmişdə ''Lester''də Çağlar Söyüncü, Cengiz Ündər kimi Türkiyə yığmasının üzvləri, eləcə də Gökhan İnlər kimi türkəsilli futbolçu çıxış edib. 1990-cı illərin sonlarında, 2000-ci illərin əvvəllərində isə bu klubda türkəsilli Mustafa İzzət öz çıxışı ilə populyarlıq qazanmışdı.