''Qalatasaray'' bu mövsüm həm Türkiyə çempionatında, həm də avrokuboklarda sərgilədiyi performansla diqqət çəkən Yunus Akgün ilə yeni müqaviləylə bağlı danışıqları davam etdirir.

''Football-plus.az'' xəbər verir ki, tərəflər arasında uzun müddətdi, danışıqlar aparılsa da, hələ ki, anlaşma əldə etmək mümkün olmayıb. Türkiyə yığmasının üzvünün İstanbul nəhəngi ilə müqaviləsinin müddəti gələn ilin yayında başa çatacaq. İstedadlı futbolçu hazırda illik 460 min avro qazanır. ''Qalatasaray'' ona 2 milyon avro maaş olmaqla üçillik müqavilə təklif edir. Amma 24 yaşlı futbolçu illik 3 milyon avro maaş tələb edir. Rəhbərlik isə bunu qəbul etmir.

Türkiyə mətbuatının yazdığına inansaq, Yunusun meneceri ilə rəhbərlik arasında baş tutan son görüş gərgin keçib. Futbolçunun indiki müqaviləsində 10 milyon avroluq təzminat maddəsi mövcuddu. Yunusun meneceri tələblərinin qəbul olunmayacağı təqdirdə təzminat maddəsindən yararlanaraq ayrılacaqlarını bildirib. Bu günlərdə Akgünə Dortmund ''Borussiya''sının ciddi maraq göstərdiyi iddia edilmişdi.

Görünən odu ki, rəhbərlik bu mövsümün sonuna qədər Yunusla anlaşa bilməsə, müqaviləsinin son mövsümündə onunla anlaşmaq daha da çətin olacaq. ''Qalatasaray''ın öz yetirməsi olan və daha öncə icarə əsasında ''Adana Dəmirspor'' və ''Lester''də top qovan Yunus Akgün bu mövsüm 30 rəsmi oyunda 2147 dəqiqə meydanda olub və aktivinə 11 qol, 7 məhsuldar ötürmə yazıb.

Yunus bu mövsüm Viktor Osimhendən sonra komandanın ən məhsuldar ikinci oyunçusudu.

ƏLİ