Son günlər transferdə bir xeyli fəallaşan ''Qalatasaray'' heyətini növbəti futbolçu ilə gücləndirməyə yaxındı.

''Football-plus.az'' xəbər verir ki, Türkiyə çempionu bu qış Ahmed Kutucu, Alvaro Morata, Mario Lemina və Karlos Kuestanın ardından 5-ci transferini reallaşdırmaq üzrədi.

Rəhbərlik baş məşqçi Okan Burukun istəyi ilə ''Lans''ın üzvü Pşemislav Frankovskiyə rəsmi təklif irəli sürüb. Polşa yığmasının üzvü ilə artıq anlaşmaq mümkün olub. Klublar arasında isə danışıqlar davam edir. ''Cim-Bom''un 5 milyon avroluq təklifi fransızlar tərəfindən geri çevirildiyindən komanda təklifi 7 milyon avroya yüksəldib.

Bu gün ''Lans'' Liqa-1-də ''Nitsa'' ilə qarşılaşacaq. Frankovski transfer durumuna görə bu oyunun iştirak ərizəsinə salınmayıb.

Həm yarımmüdafiənin mərkəzində, həm də müdafiənin cinahlarında oynamağı bacaran 29 yaşlı futbolçu ''Lans''a 2021-ci ildə 2,3 milyon avroya ''Çikaqo''dan transfer olunub.

''Qalatasaray''la 2027-yə qədər müqavilə imzalayacağı gözlənilən Frankovski bu mövsüm 21 rəsmi oyunda iştirak edərək 1659 dəqiqə meydanda olub və aktivinə 5 qol, 2 məhsuldar ötürmə yazıb.

ƏLİ