Yanvarın 24-də Argentina klub futbolunda növbəti mübarizəyə start verildi. Ölkə çempionatının ötən il dekabrın 16-də keçirilən son oyunundan 39 gün sonra bu turnirin növbəti mövsümü başladı.

Xatırladaq ki, son mövsüm “Veles Sarsfild”in 11 illik fasilədən sonra 11-ci çempionluğu ilə sona çatmış, “Talyeres de Kordoba” gümüş, “Rasinq” bürünc mükafatçı olmuşdu. Yeni mövsüm fərqli format əsasında keçiriləcək. İştirakçıların sayı 28-dən 30-a artırılıb. Ötən mövsüm yüksək liqada çıxış edən komandalara “San Martin San Xuan” ilə “Aldosivi” qoşulub. Komandalar birdövrəli sistemlə iki qrupda yarışacaqlar. Amma təşkilatçı qurum əlavə bir turun keçirilməsini də lazım bilib ki, belə hal Argentina futbolunda yenilik sayılmır. Başqa sözlə, qrup mərhələsi 15 deyil, 16 turdan ibarət olacaq. Bu mərhələyə mayın 4-də yekun vurulacaq. Sonra qruplarda ilk 8 yeri tutacaq komandalar arasında 1/8 final matçları təşkil ediləcək. Daha sonra isə 1/4 final, yarımfinal və final oyunları ilə çempionatın qalibi müəyyənləşəcək.

İlk turda qeydə alınan nəticələrə nəzər salarkən diqqəti cəlb edən əsas fakt son çempion ilə vitse-çempionun startdaca büdrəməsidi. Amma əvvəlcə Qustavo Kinterosun “Veles Sarsfild”dəki fəaliyyətinin bir il çəkdiyini bildirək. Baş məşqçi vəzifəsinə 2023-cü ilin dekabrında təyinat alan boliviyalı mütəxəssis rəhbərliyin etimadını doğruldandan sonra Braziliyaya yollanıb: 59 yaşlı məşqçi indi “Qremio”nun başındadı. “Veles”in rəhbərliyi Kinterosun yerinə Sebastyan Domingesi təyin edib. Maraqlıdı ki, 44 yaşlı mütəxəssisin yeni komandası ilk turda bu ay ayrıldığı “Tiqre”yə qarşı oynadı. Bu komanda yeni baş məşqçisi Dieqo Dabovenin başçılığı altında son çempionu 3:0 hesabıyla məğlub etdi. 52 yaşlı mütəxəssisin sabiq komandası “İnstituto”dan gətirdiyi 24 yaşlı hücumçu Russo “Veles”in qapısından iki top keçirdi.

“Talyeres de Kordoba” da yeni mövsümə uğursuz start verdi. Aleksander Medina ilə gümüş medallara sahib komanda səfərdə “San Lorenso”ya minimal hesabla məğlub oldu. Son mövsümün bürünc mükafatçısı “Rasinq” isə ilk turda azarkeşlərini qələbə ilə sevindirdi. Qustavo Kostasın komandası “Barrakas Sentral”a səfərdə 3:1 hesabıyla qalib gəldi.

Ötən mövsümün uğursuzları sırasında olan ölkə nəhəngləri ilk turda hesabına bir xal yaza bildilər. “River Pleyt” səfərdə “Platense” ilə 1:1, “Boka Xuniors” isə evdə “Arxentinos Xuniors” ilə qolsuz heç-heçəyə razılaşdı.

qrup mərhələsi, 1-ci tur
Tiqre - Veles Sarsfild 3:0
Russo, 3; 9. Orteqa, 47.

San Lorenso - Talyeres de Kordoba 1:0
Vomberqar, 81.

Barrakas Sentral - Rasinq 1:3
Bruera, 21 – Vyetto, 30. A.Martines, 74. Balboa, 90+2.

Platense - River Pleyt 1:1
İ.Vaskes, 12 – Roxas, 87.

Boka Xuniors - Arxentinos Xuniors 0:0

Qodoy Krus - Rosario Sentral 0:3
Kopetti, 18. Malkorra, 26. Kampas, 48.

Nyuellz Old Boyz - İndependyente Rivadaviya 0:1
Peynipil, 43.

Defensa y Xustisiya – Banfild 0:1
Nasif, 59.

İndependyente - Sarmyento 2:1
Avalos, 15-p.; 48 – Manyin, 75-p.

Belqrano - Atletiko Urakan 1:1
Sabala, 34-öz qapısına – Matsantti, 38.

San Martin San Xuan - Atletiko Tukuman 0:1
Koronel, 10.

Estudiantes - Union 3:1
T.Palasios, 8. Tobio Burqos, 11. Askasibar, 21 – Verde, 80.

İnstituto - Ximnasiya 3:0
F.Suares, 34-p. Luna, 75. Asevedo, 90+5.

Sentral Kordoba – Aldosivi 1:0
Veron, 74.

Lanus - Deportivo Riestra 0:2
X.Errera, 77. Obredor, 86.

Bombardirlər: Russo (Tiqre), Avalos (İndependyente) - 2.