Yanvarın 26-da Argentina klub futbolunda növbəti mübarizəyə start verildi. Liqa Kubokunun (LK) ötən il dekabrın 17-də keçirilən final oyunundan 40 gün sonra bu turnirin növbəti mövsümü başladı.

"Football-plus.az" xəbər verir ki, 2020-ci ilin martında koronavirus pandemiyasına görə dayandırılan ölkədaxili yarışlar həmin il oktyabrın 30-da ilk dəfə təşkil edilən LK ilə bərpa olunmuşdu. Argentina Futbol Assosiasiyası pandemiya dövründə ən yüksək divizionda növbəti mövsümə vaxtında start verə bilmədiyi üçün yeni formatda LK-nın təşkilinə qərar vermişdi. Sonradan dünyasını dəyişən əfsanəvi futbolçu Dieqo Maradonanın adı verilən yarış 2021-ci il yanvarın 17-də keçirilən finalda penalti seriyasında “Banfild”ə qalib gələn “Boka Xuniors”un qələbəsi ilə sona çatmışdı. Onu da qeyd edək ki, hələ bir neçə il əvvəl pandemiyaya görə yüksək liqanı heç bir komandanın tərk etməyəcəyinə qərar verilmişdi. Futbol qurumu əvvəlcə 24 komandanın iştirakı ilə keçirilən LK-nı qısa zamanda sona çatdırmağı zəruri saymışdı. Turnirin startı 2021-ci il fevralın 13-də verilən ikinci mövsümündə isə 26 komanda iştirak etdi: onda “Platense” və “Sarmyento” da ən güclülər sırasında yarışmaq hüququ qazandı. Turnir iştirakçıları iki qrupa ayrıldılar. Klublar əvvəlcə birdövrəli sistemlə yarışdılar. 13 turdan ibarət olan qrup mərhələsinin sonunda qruplarda ilk dörd yeri tutan komandalar 1/4 finala vəsiqə qazanmaqla mükafat uğrunda mübarizə apardılar. İyunun 4-də Liqa Kubokunun ikinci mövsümünün finalı keçirildi. Həlledici oyun tərəflərdən birinin inamlı qələbəsi ilə sona çatdı. Finalda “Rasinq”i 3:0 hesabı ilə məğlub edən “Kolon” tarixində ilk dəfə turnirin qalibi oldu. LK-nın 3-cü mövsümündə də 26 komanda iştirak etdi. Amma format dəyişdi. Klublar birdövrəli sistemlə mübarizə apardılar. Yekun turnir cədvəlində ilk yeri tutan komanda çempion sayıldı. Bu adı isə “Boka Xuniors” qazandı.

28 komandanın iştirak etdiyi 4-cü mövsümün formatı yenidən dəyişdi. İştirakçılar birdövrəli sistemlə iki qrupda yarışdılar. Amma təşkilatçı qurum əlavə bir turun keçirilməsini də lazım bilmişdi. Başqa sözlə qrup mərhələsi 13 deyil, 14 turdan ibarət oldu. Bu mərhələyə ötən il noyabrın 26-da yekun vuruldu. Sonra qruplarda ilk 4 yeri tutan komandalar arasında 1/4 final matçları təşkil edildi. Daha sonra yarımfinal və final oyunları ilə LK-nın qalibi müəyyənləşdi. Finalda “Platense”ni 1:0 hesabıyla məğlub edən “Rosario Sentral” ilk dəfə kuboku muzeyinə apardı.

5-ci mövsüm də eyni sayda – 28 komandanın iştirakı və eyni format əsasında təşkil ediləcək. Qrup mərhələsinə aprelin 14-də yekun vurulacaq. Sonra mübarizə 1/4 finaldan başlayaraq pley-off mərhələləri ilə davam edəcək. Yeni mövsümdə iştirakçılardan ikisinin dəyişdiyini də bildirək. “Kolon” və “Arsenal” Argentina çempionatının yüksək liqasını tərk ediblər. Bu komandaları LK-da “Deportivo Riestra” ilə “İndependyente Rivadaviya” əvəzləyiblər. İlk turda qeydə alınan nəticələrə nəzər salarkən diqqəti cəlb edən əsas fakt son çempion ilə finalçının startdaca büdrəməsidi. 67 yaşlı Migel Russonun çalışdırdığı “Rosario Sentral” səfərdə “Atletiko Tukuman” ilə 1:1 hesablı heç-heçəyə razılaşdı. “Platense” isə evdə “Boka Xuniors”la qolsuz “sülh bağladı”. Qeyd edək ki, Martin Palermo “Platense”ni tərk edib. Onu baş məşqçi vəzifəsində 43 yaşlı Sebastyan Qratsini əvəzləyib. Elə “Boka Xuniors” da yeni ilə yeni çalışdırıcının – 45 yaşlı Dieqo Martinesin başçılığı altında başlayıb. Ölkə futbolunun digər nəhəngi “River Pleyt” də yeni mövsümə xal itkisi ilə başladı. Martin Demiçelisin komandası evdə “Arxentinos Xuniors”dan bir xal ala bildi. 1:1 hesabıyla nəticələnən oyunda ev sahibləri qələbəni sona yaxın əldən verdilər.

qrup mərhələsi, 1-ci tur
Atletiko Tukuman - Rosario Sentral 1:1
Koronel, 78 – Martines Dupuy, 23.
Platense - Boka Xuniors 0:0
River Pleyt - Arxentinos Xuniors 1:1
Borxa, 45+1 – Montyel, 84.
İnstituto – Deportivo Riestra 0:0
Tiqre - Sarmyento 0:0
Sentral Kordoba - Nyuellz Old Boyz 0:1
Çyaverano, 90+1.
Barrakas Sentral - Veles Sarsfild 1:1
Broçero, 43 – Lenni Lobato, 10.
Talyeres de Kordoba - Ximnasiya 0:1
Katalan, 69-öz qapısına.
Banfild - Atletiko Urakan 0:2
Alarkon, 44; 81.
İndependyente Rivadaviya – İndependyente 0:1
A.Kosta, 48.
San Lorenso - Lanus 0:2
Bou, 86; 90+1.
Rasinq - Union 0:1
Moskeyra, 13.
Qodoy Krus - Defensa y Xustisiya 2:0
Koneçni, 79-p. E.Lopes, 80.
Estudiantes - Belqrano 1:0
Mankuso, 90+4.
Bombardirlər: Alarkon (Atletiko Urakan), Bou (Lanus) - 2.