final
Veles Sarsfild - Sentral Kordoba 0:1
Qodoy, 54.

Dekabrın 12-də Argentina kubokunun qalibi müəyyənləşdi. Finalda ölkə nəhənglərindən heç birinin görünməməsi diqqəti cəlb edən əsas məqam idi. Maraq üçün finalçılardan “Veles Sarsfild”in yarımfinalda “Boka Xuniors”u 4:3, “Sentral Kordoba”nın “Atletiko Urakan”ı 2:1 hesabı ilə məğlub etdiyini bildirək. Deməli, Santa Fe şəhərində keçirilən son oyunda turnirin yeni qalibi məlum olacaqdı. Ona görə ki, “Veles Sarsfild” indiyədək finalda belə görünməmişdi, “Sentral Kordoba” isə 2019-cu ildəki finalda “River Pleyt”ə 0:3 hesabıyla uduzmuşdu.

Bu dəfə də həlledici matç kordobalıların rəqibinin böyük üstünlüyü şəraitində keçdi. Final ərəfəsində ölkə çempionatının turnir cədvəlində 1-ci yeri tutan “Veles” qapıya dəqiq zərbələr üzrə rəqibindən 7:3 hesabıyla üstün oldu. Qeyd edək ki, kordobalıların qapıçısı İnqolotti bütün zərbələri zərərsizləşdirdi. 24 yaşlı əlcək sahibinin seyvləri komandasının sürpriz qələbəsində mühüm rol oynadı. Qodoyun ikinci hissənin əvvəlində vurduğu yeganə qol “ağ-qaralar”ın ölkə kubokunda ilk uğuru üçün kifayət etdi. “Sentral Kordoba” bu kuboku qazanan 7-ci komanda oldu. Turnirin ən titullu komandasının “Boka Xuniors” (4 dəfə) olduğunu da xatırladaq.